Հայաստանի և Ռումինիայի ժողովուրդների միջև գոյություն ունեցող դարավոր կապերը և համատեղ ապրելու փորձը ամուր հիմքեր են ստեղծում Ռումինիայի և Հայաստանի միջև զարգացնելու սերտ համագործակցություն, նախօրեին Ռումինիայում ՀՀ նորանշանակ դեսպան Համլետ Գասպարյանի հետ հանդիպման ժամանակ հայտարարել է Ռումինիայի Սենատի նախագահ Միրչա Ջոանան (Mircea Geoana):
Ինչպես ուրբաթ «Նովոստի-Արմենիա» գործակալությանը տեղեկացրեցին ՀՀ ԱԳՆ մամուլի ծառայությունից, արժևորելով բարձր մակարդակով ընթացող քաղաքական երկխոսությունը երկկողմ և միջազգային հետաքրքրություն ներկայացնող հարցերի շուրջ` Ջոանան պատրաստակամություն է հայտնել այն ընդարձակելու նաև խորհրդարանական մակարդակով, խորհրդարանների ղեկավարության և բարեկամական խմբերի միջև:
Կարևորելով Հարավային Կովկասի տարածաշրջանը Եվրոպայի համար և պատմականորեն և քաղաքակրթորեն այն համարելով նրա բնական մասը` Միրչա Ջոանան համագործակցության արդյունավետ և հեռանկարային շրջանակներ է նշել ԵՄ Արևելյան գործընկերությունը և Սևծովյան տնտեսական համագործակցության կազմակերպությունը, որոնց մեջ Ռումինիան հանդես է բերում մեծ հետաքրքրություն և ակտիվություն:
Նա հույս է հայտնել, որ տեսանելի ապագայում Հարավային Կովկասում և նրա շուրջ առկա լարվածությունները կթուլանան` հնարավորություն տալով լիարժեք կերպով օգտագործելու տարածաշրջանի հնարավորությունները և Հայաստանին ներգրավվելու տնտեսական բազմակողմ ծրագրերի մեջ:
ՀՀ դեսպանը ընդհանուր գծերով ներկայացրել է Հայաստանի արտաքին քաղաքականության առաջնայնությունները և այն հարցերը, որոնք այս պահին կանգնած են երկրի առջև:
Երկկողմ հարաբերությունների առումով նա նշել է այն հնարավորությունները, որոնք կարող են խթանել հայ-ռումինական համագործակցությունը բոլոր ոլորտներում:-0-
