Հայ-թուրքական գործընթացը հնարավոր է շարունակվի 2011թ.-ին Թուրքիայում կայանալիք խորհրդարանական ընտրություններից հետո, կարծում է հայ փորձագետ, քաղաքական զարգացումների հետազոտական կենտրոնի նախագահ Վահան Դիլանյանը:
ՀՀ նախագահ Սերժ Սարգսյանն ապրիլի 22-ի իր հրամանագրով կասեցրել է երկրի խորհրդարանում հայ-թուրքական արձանագրությունների վավերացման ընթացակարգը՝ հայտարարելով, որ Հայաստանը պահպանում է իր ստորագրությունները փաստաթղթերի տակ։ Հայ-թուրքական արձանագրությունները մնացել են Հայաստանի Ազգային ժողովի գարնանային նստաշրջանի օրակարգում։
«Այժմ վստահորեն կարելի է հաստատել այն, որ Թուրքիան բավական քաղաքական կամք չունի հայ-թուրքական արձանագրությունների վավերացման համար, սակայն ես հուսով եմ, որ 2011թ.-ի խորհրդարանական ընտրություններից հետո դա կկատարվի»,- ուրբաթ «Նովոստի» միջազգային մամուլի կենտրոնում ասաց Դիլանյանը:
Փորձագետն ընդգծեց, որ ՀՀ նախագահ Սերժ Սարգսյանի որոշումը (գործընթացի կասեցման մասին) ստեղծված իրավիճակում լավագույն տարբերակն էր:
Քաղաքագետը պարզաբանեց, որ թուրքական իշխող Արդարություն և զարգացում կուսակցությունը չի կարող ռիսկի գնալ և վավերացնել արձանագրությունները, քանի որ այդ դեպքում թուրքական քեմալականների և իսլամականների քննադատությանը կարժանանա և կարող է կորցնել ընտրազանգվածի մեծ մասին:
Ըստ նրա, մոտակա ժամանակներում կողմերը կշարունակեն բանակցությունները, ընդ որում գործընթացը կարող է շարունակվի ԱԳՆ կամ այլ ձևաչափում:
«Այդ ժամանակաշրջանում կողմերը նաև անկախ քաղաքական ուղղություն վարելու հնարավորություն կստանան, այլ կերպ ասած, թուրքական իշխանությունները կսկսեն խոսել նախապայմանների մասին, իսկ հայկական իշխանությունները կսկսեն Հայոց ցեղասպանության միջազգային ճանաչման և քննարկման քաղաքականությունը զարգացնել»,- ասաց նա՝ ավելացնելով, որ այդ անկախ քաղաքական ուղղությունները ամուր սոցիալական բազա կապահովեն երկու երկրների իշխանությունների համար:
Դիլանյանը կարծում է, որ դա հետագայում առավել ռիսկային քաղաքական որոշումներ կայացնելու հնարավորություն կտա:
Նա նաև նշեց, որ հայ-թուրքական գործընթացը այն սակավաթիվ հարցերի կատեգորիային է վերաբերում, որտեղ համընկնում են ԱՄՆ-ի, Ռուսաստանի և Եվրամիության շահերը, իսկ այդ դեպքում գործընթացը պարզապես չի կարող դադարել:
Հայաստանի և Թուրքիայի՝ մինչև վերջին ժամանակները բավականին լարված հարաբերությունները սկսեցին կարգավորվել, երբ երկու երկրի արտգործնախարարներ Էդվարդ Նալբանդյանն ու Ահմեդ Դավութօղլուն հոկտեմբերի 10-ին Ցյուրիխի համալսարանում ստորագրեցին «Դիվանագիտական հարաբերությունների հաստատման մասին արձանագրությունը» և «Երկկողմ հարաբերությունների զարգացման մասին արձանագրությունը»: Փաստաթղթերը ստորագրումից հետո պետք է հավանության արժանանան երկու երկրների խորհրդարանների կողմից:-0-
