Հայկական պատվիրակությունը կմեկնի Լեհաստան՝ Կաչինսկու հուղարկավորությանը մասնակցելու
Հայկական պատվիրակությունը կմեկնի Լեհաստան՝ մասնակցելու նախորդ շաբաթ ավիավթարի զոհ դարձած Լեխ Կաչինսկու և մյուս բարձրաստիճան անձանց հուղարկավորությանը, տեղեկացրեց Հայաստանի վարչապետ Տիգրան Սարգսյանը:
«Մեր համաքաղաքացիները կիսում են մեր լեհ ընկերների ցավը»,- հինգշաբթի կառավարության նիստի ժամանակ ասաց վարչապետը:
Նա կառավարության անդամներին առաջարկեց մեկ րոպե լռությամբ հարգել լեհական պատվիրակության զոհված անդամների հիշատակը:
Լեհաստանի կառավարական ինքնաթիռը վթարի էր ենթարկվել ապրիլի 10-ին: Ինքնաթիռում էին եղել Լեհաստանի նախագահ Լեխ Կաչինսկին, ով լեհական պաշտոնական պատվիրակության հետ մեկնում էր Կատին՝ հուշ-միջոցառումների մասնակցելու: Ինքնաթիռում գտնվող բոլոր մարդիկ (96 հոգի) մահացել էին:
Կաչինսկու և նրա տիկնոջ՝ Մարիայի հուղարկավորությունը տեղի կունենա Կրակովում Վավել թագավորական պալատի տարածքում: Հրաժեշտի արարողությանը կմասնակցեն աշխարհի մի շարք երկրների առաջնորդներ, այդ թվում նաև ՌԴ նախագահ Դմիտրի Մեդվեդևն ու ԱՄՆ նախագահ Բարաք Օբաման:-
