Թուրքիան փակուղի է մտցրել հայ-թուրքական արձանագրությունների վավերացման գործընթացը, կարծում է Հայաստանի գիտությունների ազգային ակադեմիայի Արևելագիտության ինստիտուտի տնօրեն Ռուբեն Սաֆրաստյանը։
«Պետք է հստակ հասկանալ, որ թուրքական կողմն արձանագրությունների վավերացման ձգտում չունի։ Ըստ էության, թուրքական դիվանագիտությանը հաջողվել է գործընթացը փակուղի մտցնել՝ ելնելով սեփական ինչ-որ հաշվարկներից,»,- ասաց Սաֆրաստյանը՝ միաժամանակ հավելելով, որ փակուղիներից երբեմն ելք է լինում։
Հայաստանի և Թուրքիայի ԱԳՆ ղեկավարներ Էդվարդ Նալբանդյանը և Ահմեդ Դավութօղլուն հոկտեմբերի 10-ին Ցյուրիխում ստորագրեցին «Արձանագրություն դիվանագիտական հարաբերությունների հաստատման մասին» և «Արձանագրություն երկկողմ հարաբերությունների զարգացման մասին»։ Ստորագրումից հետո փաստաթղթերին պետք է հավանության տան երկու երկրների խորհրդարանները։
Սաֆրաստյանը նշեց, որ դժվար է ասել, թե ինչով կավարտվի բանակցային գործընթացը՝ միաժամանակ ընդգծելով, որ դրա առաջընթացը ներկայում կախված է թուրքական կողմից։
Նա ավելացրեց նաև, որ Հայաստանի և Թուրքիայի միջև միջպետական հարաբերությունների բարելավման գործընթացի այլընտրանք չկա, և եթե նույնիսկ ներկա գործընթացն ավարտվի անհաջողությամբ, ապա «վաղ թե ուշ այն կվերսկսվի»։
Հայաստանի և Թուրքիայի միջև չկան դիվանագիտական հարաբերություններ, իսկ 1993-ից, պաշտոնական Անկարայի նախաձեռնությամբ, փակ է հայ-թուրքական սահմանը։ Հարաբերությունները բարդացան, երբ Անկարան սկսեց սատարել ադրբեջանական դիրքորոշմանը՝ ղարաբաղյան հարցում, և երբ Թուրքիան կտրուկ արձագանքեց Օսմանյան կայսրությունում 1915թ. հայոց ցեղասպանության միջազգային ճանաչման գործընթացին:
Հայոց ցեղասպանության փաստը ճանաչել են բազմաթիվ երկրներ, մասնավորապես, Ուրուգվայը, Լիտվան, Ռուսաստանը, Ֆրանսիան, Իտալիայի խորհրդարանի ստորին պալատը, Գերմանիան, Հոլանդիան, Սլովակիան, Շվեդիան, Շվեյցարիան, ԱՄՆ 42 նահանգներ, ինչպես նաև Հունաստանի, Կիպրոսի, Արգենտինայի, Բելգիայի, Ուելսի խորհրդարանները, Կանադայի խորհրդարանի համայնքների պալատը և Լեհաստանի սեյմը, Վատիկանը, Եվրախորհդարանը, Եկեղեցիների համաշխարհային խորհուրդը։ -0-
