ՀՀ կառավարությունը կբարձրացնի կենսաթոշակներն արդեն 2010 թ.-ին՝ հաջորդ տարի նախատեսված բարձրացման փոխարեն, հինգշաբթի Արտաշատում տեղի ունեցած կառավարության արտագնա նիստի ժամանակ ասաց ՀՀ վարչապետ Տիգրան Սարգսյանը:
ՀՀ կառավարությունը հինգշաբթի որոշում է ընդունել Հայաստանում 2010 թ.-ին կենսաթոշակների և սոցիալական նպաստների բարձրացման մասին՝ համապատասխանաբար 11 և 15 տոկոսով: Ըստ որոշման՝ կենսաթոշակի բազային չափը կբարձրացվի 8 հազար դրամից մինչև 10500 դրամ, իսկ նպաստների բազային չափը՝ 10 հազար դրամից մինչև 12,5 հազար դրամ:
ՀՀ ֆինանսների նախարար Տիգրան Դավթյանի խոսքերով, կենսաթոշակները կբարձրացվեն 2010թ.-ի նոյեմբերի 1-ից, սոցնպաստները՝ 2010թ.-ի մայիսի 1-ից: Նա նշեց, որ բյուջեից լրացուցիչ ֆինանսական հատկացումները կկազմեն 6-6,5 միլիարդ դրամ, և կառավարությունը կփորձի իրականացնել դա պահուստների հաշվին:
Նրա խոսքերով, այդ որոշմամբ ամբողջովին փոխհատուցվում են գազի գների փոփոխությունները ընտանեկան նպաստների համակարգի մեջ ներառված 110 հազար ընտանիքների և 530 հազար թոշակառուների համար, հաղորդում է «ԱՌԿԱ» գործակալությունը:
«Խոսքը ոչ միայն գազի գների բարձրացման, այլև գնաճի բարձր մակարդակի մասին է», - ասաց ՀՀ վարչապետը: Նա նշեց, որ վերջին երկու տարվա ընթացքում Հայաստանը հայտնվեց ավելի բարձր գնաճային դաշտում:
«Կառավարության և Կենտրոնական բանկի համատեղ ջանքերի շնորհիվ մենք պետք է կարողանանք զսպել գնաճային ճնշումը Հայաստանում, և 2011-2013 թթ.-ին վերադառնալ ավելի ցածր գնաճային ֆոնի», - ասաց վարչապետը:
Այս կապակցությամբ նա նշեց, որ քանի որ 2009-2010 թթ.-ին գնաճի մակարդակը բավականին բարձր է, ակնհայտ է դառնում, որ սոցիալական ծրագրերի արդյունավետությունը զգալի նշանակություն ունի:
«ՀՀ ֆինանսների նախարարության կողմից տրամադրված հաշվարկները նախատեսում էին սոցնպաստների 10 տոկոսանոց բարձրացում, սակայն այսօր առավոտյան ՀՀ նախագահ Սերժ Սարգսյանի մոտ քննարկման ժամանակ նախագահը 15 տոկոսանոց բարձրացման անհրաժեշտության մասին հստակ հանձնարարական տվեց», - ասաց Սարգսյանը:
«Այսօրվանից մենք կարող ենք մեր թոշակառուներին տեղեկացնել, որ 2011թ.-ին նախատեսված կենսաթոշակների բարձրացումը մենք սկսում ենք 2010թ.-ից, և արդեն նոյեմբերից սկսած կենսաթոշակները կբարձրացվեն շուրջ 11 տոկոսով», - ասաց վարչապետը:
«Կարծում ենք, որ այս որոշումը կարող է զգալիորեն մեղմել երկրում գոյություն ունեցող սոցիալական խնդիրները», - ավելացրեց նա:
Միաժամանակ կառավարության ղեկավարն ընդգծեց, որ այս որոշում կրում է ոչ միայն սոցիալական, այլև քաղաքական բնույթ:
«Մենք կգտնենք ավելի քան 6 միլիարդ դրամ այդ խնդիրների լուծման համար», - նշեց Սարգսյանը:-0-
