ՀՀ նախագահը կարևորում է Հայաստանի և Ֆրանսիայի խորհրդարանների դերը երկկողմ հարաբերությունների խորացման հարցում
ՀՀ նախագահ Սերժ Սարգսյանը Ֆրանսիայի Սենատի նախագահ Ժերար Լարշեի հետ հանդիպման ընթացքում ընդգծել է երկու երկրների խորհրդարանների առանձնահատուկ դերը հայ-ֆրանսիական ավանդաբար բարեկամական և ջերմ հարաբերությունների հետագա խորացման գործում:
Ինչպես հինգշաբթի «Նովոստի-Արմենիա» գործակալությանը տեղեկացրեցին ՀՀ նախագահի մամուլի ծառայությունից, Սարգսյանը բարձր է գնահատել Սենատի Ֆրանսիա-Հայաստան բարեկամության պատգամավորական խմբի գործունեությունը և միջխորհրդարանական կառույցներում համագործակցության ներկա մակարդակը, կարևորել հայ և ֆրանսիացի խորհրդարանականների պարբերական փոխադարձ այցելություններն ու շփումները:
Ժերար Լարշեն իր հերթին վերահաստատել է Սենատի պատրաստակամությունը` նպաստելու հայ-ֆրանսիական բարեկամության հետագա խորացմանը:
Սերժ Սարգսյանը Ֆրանսիայի Սենատի նախագահի խնդրանքով ներկայացրել է Հայաստանի Հանրապետության մոտեցումները Լեռնային Ղարաբաղի հակամարտության կարգավորման բանակցային գործընթացի, տարածաշրջանային խնդիրների և Հայաստան-Թուրքիա հարաբերությունների կարգավորման հեռանկարների վերաբերյալ: Անդրադարձ է կատարվել նաեւ երկկողմ հետաքրքրություն ներկայացնող այլ հարցերի:
Ֆրանսիա կատարած պաշտոնական այցի շրջանակներում նախագահ Սերժ Սարգսյանը հանդիպել է նաև Ֆրանսիայի Ազգային Ժողովի նախագահ Բեռնար Ակուայեի հետ:
ՀՀ նախագահը բարձր է գնահատել Ֆրանսիայի խորհրդարանի ստորին պալատի Ֆրանսիա-Հայաստան բարեկամության պատգամավորական խմբի անդամների ակտիվ գործունեությունը, ջերմությամբ ընդգծելով խմբի նախկին ու ներկա նախագահներ Ֆրանսուա Ռոշբլուանի և Ռենե Ռուքեի նշանակալի վաստակը հայ-ֆրանսիական բարեկամության ամրապնդման, մեր ժողովրդի համար առանցքային նշանակություն ունեցող ազգային խնդիրների շուրջ խմբի անդամների կողմից ցուցաբերվող սկզբունքային և անաչառ մոտեցման գործում:
Սերժ Սարգսյանն ու Բեռնար Ակուայեն մտքեր են փոխանակել նաև տարածաշրջանային խնդիրների շուրջ, անդրադարձել տարբեր բնագավառներում հայ-ֆրանսիական բարեկամական հարաբերություններն առաջ մղելու հեռանկարներին:
Ֆրանսիա կատարած պաշտոնական այցի ավարտին Սերժ Սարգսյանը Փարիզում աշխատանքային ընթրիք է ունեցել ֆրանսահայ համայնքի մի խումբ ազդեցիկ ներկայացուցիչների հետ:
ՀՀ նախագահի գլխավորած պատվիրակությունը հինգշաբթի երեկոյան Փարիզից կվերադառնա Երևան:-0-