Հայաստանը կարող է ետ կանչել երկկողմ արձանագրությունների տակ դրված ստորագրությունը. ՀՀԿ

Հայաստանը կարող է ետ կանչել երկկողմ արձանագրությունների տակ դրված իր ստորագրությունը այն դեպքում, եթե Թուրքիան շարունակի սեթևեթել, ասաց Հայաստանի Հանրապետական կուսակցության խորհրդարանական խմբակցության ղեկավար Գալուստ Սահակյանը:

«Խելամիտ ժամկետներն արդեն անցել են, և խոսելով ժողովրդական լեզվով՝ համբերության բաժակն աստիճանաբար լցվում է», - չորեքշաբթի մամուլի ասուլիսի ժամանակ ասաց նա:

Հայաստանի ու Թուրքիայի արտգործնախարարները հոկտեմբերի 10-ին Ցյուրիխի համալսարանում ստորագրեցին «Դիվանագիտական հարաբերությունների հաստատման մասին արձանագրությունը» և «Երկկողմ հարաբերությունների զարգացման մասին արձանագրությունը»: Փաստաթղթերը ստորագրումից հետո պետք է հավանության արժանանան երկու երկրների խորհրդարանների կողմից:

Այս կապակցությամբ Սահակյանն ավելացրեց, որ Ազգային ժողովի օրակարգում կներառվեն միջազգային պայմանագրերի մասին համապատասխան օրենքների մեջ արվող փոփոխությունները, որտեղ կներկայացվեն ստորագրությունը ետ կանչելու մեխանիզմները:

Հայաստանի և Թուրքիայի միջև չկան դիվանագիտական հարաբերություններ, իսկ 1993-ից, պաշտոնական Անկարայի նախաձեռնությամբ, փակ է հայ-թուրքական սահմանը։

Երկու երկրների միջև բարդ հարաբերությունները պայմանավորված են մի շարք հանգամանքներով, որոնք կապված են, մասնավորապես, Անկարայի՝ ադրբեջանական դիրքորոշման պաշտպանությամբ ղարաբաղյան հարցում, ինչպես նաև Թուրքիայի սուր արձագանքի հետ 1915 թվականին Օսմանյան կայսրությունում Հայոց ցեղասպանության միջազգային ճանաչման հետ կապված։ -0-