ՀՀ ԿԲ-ն վերաֆինանսավորման տոկոսադրույքը բարձրացրել է 0.5 տոկոսային կետով՝ մինչև 6%

Նովոստի-Արմենիա/. 2010 թ. փետրվարի 16-ի նիստում ԿԲ-ն որոշեց բարձրացնել վերաֆինանսավորման տոկոսադրույքը 0.5 տոկոսային կետով՝ սահմանելով այն 6.0%, «ԱՌԿԱ» գործակալությանը հայտնեցին ՀՀ ԿԲ մամուլի ծառայությունից:

Աղբյուրի համաձայն՝ 2010 թ.-ի հունվարին, 2009 թ.-ի դեկտեմբերի համեմատ, արձանագրվել է շուրջ 1,7% գնաճ, որի պարագայում 12-ամսյա գնաճի ցուցանիշը կազմել է 7,0%` գերազանցելով նպատակային միջակայքի վերին սահմանը 1,5 տոկոսային կետով:

Ինչպես ասվում է հաղորդագրության մեջ, հանքահումքային ու հիմնական պարենային ապրանքների միջազգային գների աճը, ինչպես նաև ընդլայնողական հարկաբյուջետային քաղաքականությամբ պայմանավորված ամբողջական պահանջարկի աստիճանական վերականգնումը նպաստում են առկա գնաճային միջավայրի պահպանմանը:

«Թեև կանխատեսվող հորիզոնում 12-ամսյա գնաճը գերազանցելու է նպատակային թիրախը, նախորդ տարվա գնաճային զարգացումներով պայմանավորված, 2010 թ. առաջին եռամսյակում իր բարձրակետին հասնելուց հետո այն հետագայում որոշակիորեն նվազելու է»,- ասվում է հաղորդագրության մեջ:

«Գնաճի վերոնշյալ միտումների ներքո  դրամավարկային քաղաքականության աստիճանական կոշտացմամբ ԿԲ խորհուրդը նպատակ ունի աստիճանաբար նվազեցնել կանխատեսվող հորիզոնում գնաճի շեղումները նպատակային թիրախից»,- ասվում է հաղորդագրության մեջե:

Վերջին անգամ վերաֆինանսավորման տոկոսադրույքը բարձրացվել էր հունվարի 21-ին 0,5 տոկոսային կետով՝ մինչև 5,5 տոկոս: -0-