«Այբ» կրթական հիմնադրամը hայտնում է, որ «Կենգուրու» միջազգային մաթեմատիկական մրցույթին մասնակցել ցանկացող դպրոցների գրանցումը սկսված է, հաղորդում է հիմնադրամի մամուլի ծառայությունը:
Հանրապետության ավելի քան 1200 դպրոցների արդեն ուղարկվել են մրցութային փաթեթները, որոնցում ամփոփված են դպրոցի մասնակցության հայտը, անցկացման մանրամասն կարգը, այլ անհրաժեշտ տեղեկություններ: Եվ երեխաների ու դպրոցների ոգևորված արձագանքներն սպասել չեն տալիս:
Մրցույթի կանոններն ու մասնակցության կարգը էական փոփոխությունների չեն ենթարկվել: «Կենգուր» 2010-ի մանրամասներին կարելի է ծանոթանալ ինչպես «Կենգուրուի» կայքէջում` www.kangaroo.am, այնպես էլ մասնակցող դպրոցներում:
Հաճելի նորամուծություն է այն, որ այս տարի «Կենգուրուի» խնդիրները լինելու են երկլեզու բոլոր երեխաների համար` հայերեն և ռուսերեն: Մրցույթի օրը երեխան հնարավորություն կունենա ընտրել խնդիրները կարդալու և հասկանալու իրեն հարմար լեզուն: Այս հնարավորությունը ընձեռվել է Հայաստանում «Ռոսսոտրուդնիչեստվո»-ի ներկայացուցչության շնորհիվ:
Այս տարի մրցույթը Հայաստանում կանցկացվի մարտի 18-ին, «Այբ» կրթական հիմնադրամի կողմից, ՀՀ կրթության և գիտության նախարարության հովանու ներքո: Դպրոցում երեխաների գրանցման և դպրոցների հայտերի ներկայացման վերջնաժամկետն է փետրվարի 24-ը:
«Կենգուրու» մրցույթի գլխավոր գործընկերը ՎՏԲ-Հայաստան բանկն է:
«Կենգուրուն» տրամաբանական և բավականին հետաքրքրաշարժ խնդիրներից կազմված մրցույթ է, որն ամեն տարի նույն օրն անցկացվում է մոտ 50 երկրում` ավելի քան 5 միլիոն դպրոցականի մասնակցությամբ:
«Կենգուրու» մրցույթն անցկացվում է անմիջականորեն դպրոցներում` երեխաների համար հարազատ միջավայրում, և մասնակցության նախապայմաններ չկան: Երեխաներից չի պահանջվում դպրոցական ծրագրի, բանաձևերի փայլուն իմացություն կամ միայն գերազանց գնահատականներ մաթեմատիկայից: Փոխարենը` «Կենգուրուի» խաղային ոճով կազմված խնդիրները դուր են գալիս տարբեր առաջադիմություններով երեխաներին: Մրցույթը դպրոցականների շրջանում մեծ մասսայականություն է վայելում նաև շնորհիվ մասնակիցների տարիքային լայն խմբերի: -0-
