Հայաստանում ՌԴ դեսպանատան աշխատակիցները, շարունակելով կյանքից հեռացած դիվանագիտական ծառայության վետերաններին ամեն տարի հիշելու ավանդույթը, չորեքշաբթի ծաղիկներ կդնեն Երևանի քաղաքային գերեզմանատանն ու Նուբարաշենի գերեզմանատանը գտնվող խորհրդային և ռուս դիվանագետների շիրիմներին և հուշարձաններին, երեքշաբթի «Նովոստի-Արմենիա» գործակալությանը տեղեկացրեցին ՌԴ դեսպանատան մամուլի ծառայությունից:
Փետրվարի 10-ին Ռուսաստանում նշվում է պրոֆեսիոնալ տոն՝ Դիվանագետների օրը: Հենց այդ օրը, 1549 թ. թվագրմամբ է հայտնի Ռուսաստանի արտաքին գերատեսչության դեսպանի ամենահին հրամանագիրը:
Դիվանագետների օրը սահմանվել է ՌԴ նախագահի՝ 2002թ.-ի հոկտեմբերի 31-ի հրամանագրով, երբ ռուսական դիվանագիտական ծառայությունը նշում էր իր 200-ամյա հոբելյանը:
Տեղեկատվության համաձայն, ծաղիկներ կդրվեն, մասնավորապես՝ Մոնրեալում (Կանադա) ՌԴ Գլխավոր հյուպատոսության հյուպատոս-խորհրդական, ՌԴ ԱԳՆ Կադրերի դեպարտամենտի աշխատակից, Տուրկույում (Ֆինլանդիա) Գլխավոր հյուպատոսության փոխհյուպատոս և հյուպատոս Մամիկոն Վարդանյանի, Հայկական ԽՍՀ արտգործնախարար (1946-1976 թթ), միաժամանակ Հայկական ԽՍՀ Նախարարների խորհրդի փոխնախագահ Սահակ Կարապետյանի, Հայկական ԽՍՀ-ի արտգործնախարար (1975-1985 թթ) Ջոն Կիրակոսյանի, Հայկական ԽՍՀ արտգործնախարար (1952-1966 թթ), միաժամանակ Հայկական ԽՍՀ Նախարարների խորհրդի փոխնախագահ Անտոն Քոչինյանի, 1970-1975 թթ.-ին Ֆրանսիայում ԽՍՀՄ դեսպանատան առաջին քարտուղար Հենրիկ Լիլոյանի, 1921-1923 թթ.-ին Հայկական ԽՍՀ արտաքին գործերի ժողովրդական կոմիսար, միաժամանակ Հայկական ԽՍՀ Խորհրդային ժողովրդական կոմիսարիատի փոխնախագահ Ասքանազ Մռավյանի, Վիետնամում ԽՍՀՄ դեսպան (1961-1965 թթ), Լիբիայում ԽՍՀՄ դեսպան (1966-1970 թթ.) Սուրեն Թովմասյանի շիրիմներին:
Դեսպանատան տեղեկատվության մեջ նշվում է, որ ծաղկեպսակ և ծաղիկներ կդրվեն նաև հայտնի ռուս պոետ, թատերագիր և դիվանագետ Ալեքսանդր Գրիբոյեդովի հուշարձանի մոտ, ով ակտիվորեն մասնակցել է 1828 թ.-ի Թուրքմենչայի պայմանագրի կնքման գործում, որի համաձայն՝ ռուս-պարսական պատերազմի ավարտից հետո Արևելյան Հայաստանը միացել է Ռուսական կայսրությանը և փրկվել է պարսից ստրկացումից:-0-
