ԵՐԵՎԱՆ, 5 փետրվարի. /Նովոստի-Արմենիա/. Միացյալ Նահանգները պատրաստ է շարունակել իրենց օժանդակությունը հայ-թուրքական հարաբերությունների կարգավորման գործընթացին, հինգշաբթի Երևանում ՀՀ նախագահ Սերժ Սարգսյանի հետ հանդիպման ժամանակ ասել է ԱՄՆ պետքարտուղարի առաջին տեղակալ Ջեյմս Սթայնբերգը:
«Սթայնբերգը բարձր է գնահատել տարածաշրջանային խնդիրների լուծման ուղղությամբ Հայաստանի գործադրած ջանքերը՝ ևս մեկ անգամ ընդգծելով, որ հայ-թուրքական հարաբերությունների կարգավորումը Միացյալ Նահանգների համար շատ կարևոր է, և ԱՄՆ-ն պատրաստ է շարունակել իր օժանդակությունը գործընթացին», - հաղորդում է ՀՀ նախագահի մամուլի ծառայությունը:
Սթայնբերգը ևս մեկ անգամ ընդգծել է ամերիկյան կողմի դիրքորոշումը Հայաստանի Սահմանադրական դատարանի որոշման վերաբերյալ` նշելով, որ այն դրական քայլ է գործընթացի շարունակման համար: Ամերիկացի դիվանագետը գործընթացն առաջ մղելու համար անհրաժեշտ է համարել կողմերի քաղաքական կամքի դրսևորումը:
Նախագահ Սարգսյանն իր հերթին ողջունել է բազմակողմ հարաբերություններում Միացյալ Նահանգների հավասարակշռված քաղաքականությունը:
Հայաստանի և Թուրքիայի հարաբերությունները բավականին լարված էին մինչև վերջերս, երբ երկու երկրների արտգործնախարարները հոկտեմբերի 10-ին Ցյուրիխի համալսարանում ստորագրեցին «Դիվանագիտական հարաբերությունների հաստատման մասին արձանագրությունը» և «Երկկողմ հարաբերությունների զարգացման մասին արձանագրությունը»: Փաստաթղթերը ստորագրումից հետո պետք է հավանության արժանանան երկու երկրների խորհրդարանների կողմից:
Հայաստանի և Թուրքիայի միջև չկան դիվանագիտական հարաբերություններ, իսկ 1993-ից, պաշտոնական Անկարայի նախաձեռնությամբ, փակ է հայ-թուրքական սահմանը։
Երկու երկրի միջև բարդ հարաբերությունները պայմանավորված են մի շարք հանգամանքներով, որոնք կապված են, մասնավորապես, Անկարայի՝ ադրբեջանական դիրքորոշման պաշտպանությամբ ղարաբաղյան հարցում, ինչպես նաև Թուրքիայի սուր արձագանքի հետ 1915 թվականին Օսմանյան կայսրությունում Հայոց ցեղասպանության միջազգային ճանաչման հետ կապված։
ՀՀ Սահմանադրական դատարանը 2009թ. հունվարի 12-ին երկրի Սահմանադրությանը համապատասխանող ճանաչեց «Հայաստանի Հանրապետության և Թուրքիայի Հանրապետության միջև դիվանագիտական հարաբերությունների հաստատման մասին» ու «Հայաստանի Հանրապետության եւ Թուրքիայի Հանրապետության միջև երկկողմ հարաբերությունների զարգացման մասին» արձանագրություններում ամրագրված պարտավորությունները:
Միաժամանակ Թուրքիայի արտաքին գործերի նախարարությունը հայտարարություն էր տարածել, որում նշել էր, որ 2009 թվականի հոկտեմբերի 10-ին Ցյուրիխում ստորագրված հայ-թուրքական արձանագրությունների՝ Սահմանադրությանը համապատասխան ճանաչելու վերաբերյալ Հայաստանի Սահմանադրական Դատարանի որոշումը պարունակում է արձանագրությունների տառին և ոգուն չհամապատասխանող նախապայմաններ և սահմանափակող դրույթներ։
ՀՀ Սահմանադրական դատարանի որոշումը քննադատել է նաև Թուրքիայի վարչապետ Ռեջեփ Թայիպ Էրդողանը:-0-
