Մարտիրոս Սարյանի աշխատանքների ցուցահանդեսը կանցկացվի փետրվարի 26-ին Տրետյակովյան պատկերասրահում

ԵՐԵՎԱՆ, 2 փետրվարի. /Նովոստի-Արմենիա/. Հայ մեծ նկարիչ Մարտիրոս Սարյանի աշխատանքների ցուցահանդեսը կանցկացվի փետրվարի 26-ին Մոսկվայի Տրետյակովյան պատկերասրահում, երկուշաբթի հայտնեց Հանրային Խորհրդի պատմական-ազգային արժեքների, հուշարձանների պահպանության, պատկանելության և օգտագործման հարցերի ենթահանձնաժողովի ղեկավար Ժասմեն Ասրյանը։

Ըստ նրա, ցուցահանդեսը նվիրված կլինի նկարչի՝ փետրվարի 28-ին նշվող 130-ամյակին։ «Նկարչի թանկարժեք աշխատանքները շուրջ հարյուր տարի ցուցադրվում են Մոսկվայում»,- ընդգծեց Ասրյանը հանձնաժողովի նիստին։ 

Նա հայտնեց նաև, որ աշնանը նկարչի մոսկովյան բնակարանի շենքի պատին, Հին Արբատում, որտեղ Սարյանն ապրել և ստեղծագործել է մինչև քսաներորդ դարի 70-ական թվականները, հուշատախտակ կտեղադրվի։

Մարտիրոս Սարյանը (1880-1972թթ.) 20-րդ դարի հայ գեղանկարչության խոշորագույն վարպետներից է, որը շարունակել է սիմվոլիզմի ավանդույթները։ Նա ծնվել է Նոր Նախիջևան քաղաքում (ներկայումս Դոնի Ռոստովի կազմում)։

1897թ.-ին ընդունվել է Մոսկվայի գեղանկարչության, քանդակագործության և ճարտարապետության ուսումնարան, որն ավարտել է 1904թ.։ Նրա ուսուցիչների թվում այնպիսի հայտնի ռուս նկարիչներ են եղել, ինչպիսիք են Սերովը և Կորովինը։

Մինչև 1917թ. հոկտեմբերյան հեղաշրջումը մեծ մասամբ բնակվել է Թբիլիսիում և Մոսկվայում, 1921թ.-ից հաստատվել է Երևանում։ Մասնակցել է «Երկնագույն վարդ» (1907թ.), ինչպես նաև «Ռուս նկարիչների միության» և «Արվեստի աշխարհի» ցուցահանդեսներին։--0—