Հայաստանի նախագահը կոչ արեց Վերահսկիչ պալատի աշխատակիցներին ճնշումների չտրվել և կարողանալ «ոչ» ասել
ԵՐԵՎԱՆ, 22 հունվարի. /Նովոստի-Արմենիա/. ՀՀ նախագահ Սերժ Սարգսյանը
Վերահսկիչ պալատի աշխատակիցների հետ հանդիպման ընթացքում կոչ արեց նրանց չտրվել ճնշումների և կարողանալ «ոչ» ասել, ավելի սկզբունքային լինել բացահայտված թերությունների վերացման գործում։
«Ձեզանից յուրաքանչյուրը պետք է կարողանա «ոչ» ասել իր բարեկամին, ընկերոջը, հարազատին կամ ցանկացած պետպաշտոնյային։ Եթե մարդն, ումից կախված է այլ մարդկանց աշխատանքի գնահատականը, չի կարողանում ասել «ոչ», նա չի կարող արդյունավետ աշխատել այս պաշտոնում»,- հայտարարեց նախագահը՝ հավելելով, որ նույնիսկ մտերիմ մարդու խնդրանքը ճնշման մի ձև է։
Նա նշեց, որ նույնիսկ չնայած Հայաստանի յուրահատուկ պայմաններին, Վերահսկիչ պալատի աշխատակիցներն ու առհասարակ պետպաշտոնյաները պետք է բարձունքի վրա լինեն և անթերի կատարեն իրենց աշխատանքը։
«Մենք փոքր երկիր ենք, և կարծում եմ՝ բավական է մի քանի ժամ, որպեսզի մարդիկ, լինեն դրանք հանցագործներ, իրավախախտողներ կամ թերացումներ թույլ տված անձինք, ուղի գտնեն ցանկացած պետպաշտոնյայի վրա ազդեցություն գործելու համար»,- նկատեց նա։
Սարգսյանն ընդգծեց, որ եթե աշխարհի ցանկացած երկրում ոտնձգությունը պետական սեփականության նկատմամբ հանցագործություն է համարվում, ապա Հայաստանում դա կրկնակի հանցագործություն է՝ նկատի առնելով մի շարք խնդիրներ։
Նախագահն ավելացրեց, որ պետական փողերի նկատմամբ ոտնձգություն կատարած պաշտոնյան պետք է ամենաանընդունելի մարդը դառնա հայկական հասարակությունում, և Վերահկսիչ պալատը պետք է կարևոր դեր խաղա հասարակությունում նման մոտեցման ձևավորման հարցում։ -0-