Գարեգին Երկրորդը ՈւԺՄՄՀ-ի մրցանակի գումարը կփոխացնի Երևանում ռուսական եկեղեցու կառուցմանը

Ամենայն Հայոց Գարեգին Երկրորդ Կաթողիկոսը խնդրել է Ուղղափառ ժողովուրդների միասնության միջազգային հիմնադրամի (ՈւԺՄՄՀ) կողմից իրեն հանձնված մրցանակի գումարը փոխանցել Երևանում նոր ուղղափառ եկեղեցու կառուցման հիմնադրամին, հաղորդում է «ՌԻԱ Նովոստիի» թղթակիցը:

Մրցանակակիրների պարգևատրման հանդիսավոր արարողությունը տեղի է ունեցել հինգշաբթի Մոսկվայի Քրիստոս Փրկչի տաճարի Եկեղեցական Ժողովների սրահում: Մոսկվայի և Համայն Ռուսիո Պատրիարք Կիրիլը նաև մրցանակները հանձնել է ՌԴ նախագահ Դմիտրի Մեդվեդևին, սերբ կինոռեժիսոր Էմիր Կուստուրիցային և Նյու Յորքի Սուրբ Վլադիմիրի հոգևոր ճեմարանի ներկայացուցիչներին:

Դիպլոմից և հուշամեդալից բացի ՈւԺՄՄՀ-ի յուրաքանչյուր մրցանակն ունի նաև դրամական բաղկացուցիչ՝ 20-50 հազար դոլար:

«Ուրախ ենք տեղեկացնել, որ Երևանում սկսվել են նոր ռուսական ուղղափառ եկեղեցու կառուցման աշխատանքները, ինչի կապակցությամբ հիմնադրամի հոգաբարձուների խորհրդին խնդրում ենք մեր դրամական մրցանակը փոխանցել եկեղեցու կառուցման հիմնադրամին», - մրցանակաբաշխության արարողության ժամանակ հայտարարել է Գարեգին Երկրորդը:

Ամենայն Հայոց Կաթողիկոսը պարգևատրվել է 2009 թ.-ին Ալեքսեյ Երկրորդ Պատրիարքի անունը կրող ՈւԺՄՄՀ-ի մրցանակով «Ուղղափառ ժողովուրդների միաբանության ամրապնդման գործում ականավոր գործունեության, հասարակության կյանքում քրիստոնեական արժեքների հաստատման և տարածման համար»:

ՈւԺՄՄՀ-ի մրցանակներն ամեն տարի հանձնվում են պետությունների, կառավարությունների և խորհրդարանների ղեկավարներին, ուղղափառ եկեղեցիների առաջնորդներին, խոշոր հասարակական առաջնորդներին և մշակույթի գործիչներին «պետությունների՝ արևելաքրիստոնեական ավանդույթների համատեքստում պատմականորեն ձևավորված տնտեսական և քաղաքական կապերի ամրապնդման գործում կատարած մեծ ներդրման, ուղղափառ հասարակության կյանքում քրիստոնեական բարոյականության բարձր նորմերի հաստատման համար»:

2009 թ.-ի մրցանակը կրում է Ռուս ուղղափառ եկեղեցու նախկին պատրիարք Ալեքսեյ Երկրորդի անունը, ով գլխավորել է Ուղղափառ ժողովուրդների միասնության հիմնադրամի հոգաբարձուների խորհուրդը ստեղծման պահից՝ 1995 թ.-ից մինչև իր կյանքի վերջը:-0-