Թուրքիայի կառավարությունն անում է հնարավորինը՝ հայ-թուրքական արձանագրություններն առանց նախապայմանների վավերացնելու համար. արտգործնախարար

Թուրքիայի կառավարությունն անում է հնարավորինը՝ դիվանագիտական հարաբերությունների կարգավորման մասին հայ-թուրքական արձանագրություններն առանց նախապայմանների վավերացնելու համար:

Ինչպես այսօր տեղեկացնում է «Հաբեր Թյուրք» հեռուստաալիքը, նման հայտարարությամբ է հանդես եկել Թուրքիայի արտգործնախարար Ահմեդ Դավութօղլուն Մեծ Բրիտանիա կատարած այցի ժամանակ: Նախօրեին ուշ երեկոյան նա Լոնդոնից մեկնել է Մոսկվա, որտեղ ուղեկցելու է վարչապետ Թայիպ Էրդողանին Ռուսաստան կայանալիք աշխատանքային այցի ժամանակ:

Ինչպես հաղորդում է ԻՏԱՌ-ՏԱՍՍԸ, Դավութօղլուի հայտարարությունը հնչել է այն բանից հետո, երբ երեքշաբթի Հայաստանի Սահմանադրական դատարանը որոշել է, որ հայ-թուրքական արձանագրությունները համապատասխանում են հանրապետության Մայր օրենքին, սակայն «ունեն բացառապես երկկողմ միջպետական բնույթ» և չեն կարող տարածվել երրորդ երկրների վրա: Այս վերապահումը վերաբերում է Երևանի և Անկարայի փոխհարաբերություններին՝ կապված Ադրբեջանի և ղարաբաղյան հակամարտության կարգավորման հետ:

Դավութօղլուն իր հերթին նշել է, որ Անկարան ձգտում է «և կարգավորել հարաբերությունները Երևանի հետ, և հաղթահարել տարածաշրջանի լարվածությունը»: «Մենք հույս ունենք ստեղծել այնպիսի տարածաշրջան, որտեղ կարելի կլինի Բաքվում նստել ավտոմեքենա, անվտանգ անցնել Լեռնային Ղարաբաղով, հատել Երևանը, Նախիջևանն ու հասնել Կարս», - ասել է նախարարը:

Նրա խոսքերով՝ Կովկասի խնդիրները հաղթահարելու և լարվածությունը մեղմելու համար անհրաժեշտ է «բարձր մակարդակի հանդիպումներ անցկացնել և ամրապնդել պետությունների միջև գոյություն ունեցող փոխկախվածությունը տնտեսական ոլորտում»: «Հետապնդելով նմանատիպ նպատակ՝ մենք 51 համաձայնագիր ենք ստորագրել Սիրիայի հետ և 48 պայմանագիր՝ Իրաքի հետ, իսկ Վրաստանի Բաթումի քաղաքի օդանավակայանը կարող է որպես տարանցիկ կետ ծառայել «Թուրքական ավիաուղիների» համար», - նշել է Դավութօղլուն:

Ներկայումս Հայաստանի և Թուրքիայի միջև չկան դիվանագիտական հարաբերություններ, իսկ 1993-ից, պաշտոնական Անկարայի նախաձեռնությամբ, փակ է հայ-թուրքական սահմանը։

Երկու երկրի միջև բարդ հարաբերությունները պայմանավորված են մի շարք հանգամանքներով, որոնք կապված են, մասնավորապես, Անկարայի՝ ադրբեջանական դիրքորոշման պաշտպանությամբ ղարաբաղյան հարցում, ինչպես նաև Թուրքիայի սուր արձագանքի հետ 1915 թվականին Օսմանյան կայսրությունում Հայոց ցեղասպանության միջազգային ճանաչման հետ կապված։ Մինչ վերջերս Հայաստանի և Թուրքիայի միջև բավականին լարված հարաբերությունները սկսեցին կարգավորվել հայ-թուրքական արձանագրությունների ստորագրումից հետո:-0-