2009 թվականի դեկտեմբերը Հայաստանում անսովոր տաք է. Հայհիդրոմետ

ԵՐԵՎԱՆ, 25  դեկտեմբերի. /Նովոստի-Արմենիա/. 2009 թվականի դեկտեմբերը Հայաստանում անսովոր տաք է, ուրբաթ հայտարարեց Հայհիդրոմետի օպերատիվ հիդրոօթերևութաբանության կենտրոնի պետ Զարուհի Պետրոսյանը։

«Այս տարվա ցուցանիշները կարելի է համարել ամենաբարձրը վերջին հարյուր տարվա ընթացքում։ Կարելի է ասել, որ այս իրավիճակը մոտենում է անոմալիայի»,- ասաց Պետրոսյանը։

Նրա խոսքերով, առանձին օրերին Երևանում և Արարատյան դաշտավայրում արձանագրվել է 15 աստիճան տաքություն ըստ Ցելսիուսի, Մեղրիում՝ 20 աստիճան, իսկ Կապանում՝ 19 աստիճան։ Նա նշեց, որ նման տաք դեկտեմբերներ արձանագրվել են 1937, 1938, 1963 և 1967 թվականներին։

Պետրոսյանը նշեց, որ Հայաստանի հարավում շատ տաք եղանակի պատճառով Մեղրի քաղաքի մերձակայքում սկսել են բողբոջել բալենիներն, իսկ Արարատյան դաշտավայրում՝ վաղահաս դեղձենիներն ու ծիրանենիները։

«Երբ միջին օրական ջերմաստիճանը նորմայից բարձր է 5 աստիճանով հինգ օր անընդմեջ, բնությունն աստիճանաբար սկսում է արթնանալ։ Եթե նման իրավիճակը երկար շարունակվի, ապա դա մի փոքր կսպառնա վեգետացիոն ժամանակահատվածին»,- ասաց Պետրոսյանը, նշելով, որ ներկայում Հայաստանի գյուղատնտեսության համար լուրջ վտանգ չկա։

Նա հայտնեց նաև, որ Հայհիդրոմետի մասնագետների տվյալների և վերլուծության համաձայն, օդի բարձր ջերմաստիճանը ձմռանը երկրաշարժի նախադրյալ չէ։

Երևանի, Արարատյան դաշտավայրի և Հայաստանի լեռնային շրջանների համար օդի միջին օրական ջերմաստիճանի նորմը դեկտեմբերին կազմում է զրոյից ցածր մեկ աստիճան, իսկ ներկայում գրանցվում է 5-6 աստիճան տաքություն։ 

Ներկայում միջին օրական ջերմաստիճանն առանձին դեպքերում նորմայից բարձր է 6-10 աստիճանով։ -0-