Ղարաբաղի ազգագրության ու ավանդույթների մասին ֆիլմ կնկարահանվի 2010թ.-ին

ԵՐԵՎԱՆ, 23  դեկտեմբերի. /Նովոստի-Արմենիա/. 2010թ.-ին ծրագրվում է ֆիլմ նկարահանել Ղարաբաղի ազգագրության ու ավանդույթների մասին, չորեքշաբթի լրագրողներին ասաց «Շարժում հանուն արդարության» կազմակերպության ղեկավար, գրող-հրապարակախոս Բակուր Կարապետյանը:  Նրա խոսքերով ԼՂՀ անկախության ճանաչման համար միայն բարձրաստիճան պաշտոնյաների ելույթները բավարար չեն: «Անհրաժեշտ է ավելի լայն մոտեցումներ ապահովել, որոնք թույլ կտան Ղարաբաղն ուրիշ կողմից ներկայացնել, մասնավորապես, դրա բնական հարստությունները, մշակույթը, ազգագրությունը, ազգային ավանդույթներն ու ծիսակատարությունները»,- ասաց Կարապետյանը  

«Դիվանագետներին, քաղաքական ու պետական գործիչներին թվում է, որ իրենց ելույթները տարբեր միջազգային ատյաններում բավարար են Ղարաբաղի մասին պատկերացում ձևավորելու համար: Այն դեպքում, երբ Ղարաբաղի հետ ծանոթությունը պետք է բազմակողմանի լինի, աշխարհին անհրաժեշտ է ներկայացնել Ղարաբաղի մշակույթը, պատմական փաստերով հագեցած ազգագրությունը»,- ասաց նա: 

Կարապետյանը նշեց, որ այդ նպատակով նա «Զիզի քար» կամ «Գանձերի երկիր» կինոնկարի սցենարն է գրել, որն իրենից խաղային և փաստագրական ժանրերի յուրօրինակ սինթեզ է ներկայացնում: 

Նրա խոսքերով, ֆիլմը երկու սերիայից բաղկացած կլինի և կպատմի իռլանդացի աշխարհագրագետ և ճանապարհորդ, հայագետ, հասարակական-քաղաքական գործիչ Հենրի Լինչի ծոռի մասին, որն ապրում է Լոնդոնում և զբաղվում հնագիտությամբ: 

«Երիտասարդը մեկնում է հնագիտական ճանապարհորդության դեպի Ղարաբաղ առեղծվածային «ոսկե սարի» որոնումներում: Ժամանելով Ղարաբաղ գարնան ծաղկունքին, երբ երկրում տեղի են ունենում տարբեր ծիսակատարություններ, և ծանոթանալով ղարաբաղցի ժողովրդի մշակույթին ու ավանդույթներին, նա հասկանում է, որ Ղարաբաղի ազգագրության հետ ծանոթությունն իր հնագիտական ճանապարհորդության ամենակարևոր գանձն է ու արդյունքը»,- ասաց Կարապետյանը:  

Նա նշեց, որ ֆիլմի նկարահանումները պետք է սկսվեն գարնանը, երբ մեկնարկում են հիմնական ծիսակատարությունները, սակայն առայժմ ֆինանսավորում չի գտնվել նկարահանումների մեկնարկի համար:

«Նկարահանումների համար շուրջ 100 հազար դոլար կպահանջվի, քանի որ նկարահանումների, ռեժիսորի, ինչպես նաև ստուդիայի վերաբերյալ մյուս բոլոր պայմանավորվածություններն արդեն կան»,- ասաց Կարապետյանը:

Մասնավորապես, ըստ նրա, իր վաղեմի ընկեր ռեժիսոր Էդվարդ Բադունցը, ով այսօր ապրում է ԱՄՆ-ում, պատրաստ է ոչ միայն անձամբ մասնակցել ֆիլմի նկարահանումներին, այլև ԱՄՆ-ում ստուդիա տրամադրել նկարահանված նյութի մշակման համար:

Ընդ որում նա նշեց, որ արդեն դիմել է որոշ հիմնադրամների ու ատյանների, սակայն առայժմ ոչ մի հնարավոր հովանավորից համաձայնություն չի ստացել:-0-