ԵՐԵՎԱՆ, 21 դեկտեմբերի. /Նովոստի-Արմենիա/. «Եվրատեսիլ-2010» երգի մրցույթի ազգային ընտրության մասնակցության դիմումների ընդունումը Հայաստանում կանցկացվի հունվարի 15-ից մինչև փետրվարի 1-ը, «Նովոստի-Արմենիա» գործակալությանը հայտնեց Հայաստանի Հանրային հեռուստատեսության գլխավոր տնօրենի հատուկ հարցերի գլխավոր տնօրեն, նախագծի ղեկավար Դիանա Մնացականյանը:
Նրա խոսքերով, ընտրության ներկայացված բոլոր ստեղծագործություններից եզրափակիչ կանցնեն միայն տասը: Մրցույթի եզրափակիչը ՀՀՀ ուղիղ եթերում կհեռարձակվի փետրվարի կեսին:
«Եզրափակչի ժամանակ հեռուստադիտողների և ժյուրիի քվեարկության հիման վրա կորոշվի հաղթողը, ով Հայաստանը կներկայացնի Օսլոյում անցկացվելիք «Եվրատեսիլ-2010»-ին»,- ասաց Մնացականյանը:
Նա հիշեցրեց, որ մրցույթի կանոնների համաձայն, ընտրության ներկայացվող երգերը չպետք է կատարվեն մինչև 2009թ.-ի հոկտեմբերի 1-ը և երգի երկարությունը չպետք է գերազանցի 3 րոպեն:
Հայաստանը Եվրատեսիլ երգի մրցույթին մասնակցում է 2006թ.-ից: Լավագույն արդյունքը գրանցվել է 2008թ.-ին, երբ Սիրուշոն գրավեց 4-րդ տեղը: -0-
