Թուրքիան չի վավերացնի հայ-թուրքական արձանագրություններն առանց հայկական կողմից ղարաբաղյան հարցում զիջումների, չորեքշաբթի մամուլի ասուլիսում հայտարարեց Հայաստանի Ժողովրդական կուսակցության առաջնորդ Ստեփան Դեմիրճյանը։
«Ակնհայտ է, որ Թուրքիան կապում է այս երկու հարցերը։ Բացի այդ, գերտերությունները շահագրգռված են թե ղարաբաղյան հարցի շուտափույթ կարգավորմամբ, թե հայ-թուրքական հարաբերությունների բարելավմամբ։ Այդ իսկ պատճառով կարծում եմ՝ 2010 թվականին այս պետությունների ճնշումը Հայաստանի վրա կուժեղանա»,- ասաց Դեմիրճյանը։
Նա ընդգծեց, որ այդ ճնշումներին դիմակայելու միակ արդյունավետ եղանակը միայն հայկական հասարակության համախմբումն է։
Մեկնաբանելով Հայաստանի նախագահ Սերժ Սարգսյանի այն հայտարարությունը, որ «Հայաստանի համապատասխան պետմարմիններին հանձնարարվել է փոփոխություններ նախապատրաստել օրենսդրության այն մասով, որը վերաբերում է միջազգային պայմանագրերի ստորագրմանը, վավերացմանը, չեղյալ հայտարարելուն»՝ կուսակցության առաջնորդը նշեց, որ իր կարծիքով դա ընդամենը պատասխան է Անկարայի հայտարարություններին, այլ ոչ թե ստորագրությունը հետ կանչելու պատրաստակամություն։
«Ես չեմ կարծում, թե Հայաստանի իշխանությունները կդադարեցնեն սկսած գործընթացը»,- ասաց Դեմիրճյանը։
Հայաստանի և Թուրքիայի՝ մինչև վերջերս լարված հարաբերությունները սկսեցին հարթվել. երկու երկրների արտգործնախարներ Էդվարդ Նալբանդյանը և Ահմեդ Դավութօղլուն հոկտեմբերի 10-ին Ցյուրիխի համալսարանում ստորագրեցին «Դիվանագիտական հարաբերություններ հաստատելու մասին արձանագրությունը» և «Երկկողմ հարաբերությունների զարգացման մասին արձանագրությունը»: Փաստաթղթերը պետք է հաստատվեն երկու երկրի խորհրդարաններում:
Հայաստանի և Թուրքիայի միջև բացակայում են դիվանագիտական հարաբերությունները, իսկ 1993 թվականից պաշտոնական Անկարայի նախաձեռնությամբ փակվել է հայ-թուրքական սահմանը: Թուրքիան առաջ է քաշում մի շարք նախապայմաններ՝ երկկողմ հարաբերությունների հաստատման համար, մասնավորապես, Հայաստանի կողմից Առաջին համաշխարհային պատերազմի տարիներին Օսմանյան կայսրությունում Հայոց ցեղասպանության միջազգային ճանաչման քաղաքականությունից հրաժարվելը, Ղարաբաղյան հարցի լուծումը՝ հօգուտ Ադրբեջանի:--0—
