ԵՐԵՎԱՆ, 23 նոյեմբերի. /Նովոստի-Արմենիա/. Հայաստանի իշխող Հանրապետական կուսակցության խորհրդարանական խմբակցության քարտուղար Էդուարդ Շարմազանովը կարծում է, որ Ղարաբաղյան հիմնահարցի վերջնական լուծումը հնարավոր չէ առանց Ղարաբաղի մասնակցության:
Նրա խոսքերով, հայկական կողմը հստակ հայտարարում է այս մասին, որ համանման կարծիք ունեն նաև ԵԱՀԿ ՄԽ համանախագահ երկրների ներկայացուցիչերը:
«Կարգավորման բանալիները գտնվում են Ստեփանակերտում: Իրատեսական չէ խոսել շրջանակային համաձայնագրերի, վերջնական հիմնարար պայմանագրի մասին, քանի դեռ մեր գործընկերները չեն հասկանա, որ այդ խնդիրը վերջնականորեն չի կարող լուծվել առանց ԼՂՀ մասնակցության»,- ասաց Շարմազանովը «Նովոստի-Արմենիա» գործակալությանը տված հարցազրույցում:
Խոսելով նոյեմբերի 22 Մյունխենում ՀՀ և Ադրբեջանի նախագահներ Սերժ Սարգսյանի և Իլհամ Ալիևի բանակցությունների մասին՝ Շարմազանովը նշեց, եր համանախագահները առաջընթաց են արձանագրել, և իրենք կողմերը հայտարարել են, որ հանդիպումն անցել է կառուցողական մթնոլորտում:
«Կարևորն այն է, որ խնդիրը պետք է լուծել խաղաղ բանակցությունների ճանապարհով, հակառակ ադրբեջանական կողմին և նրա նախագահին, ով մինչև հանդիպումը հանդես է եկել ռազմատենչ հռետորությամբ»,- նշեց խմբակցության քարտուղարը:
Նրա խոսքերով, այդ հանդիպման ժամանակ նորությունն այն էր, որ համանախագահները հստակ գնահատական տվեցին նախագահ Ալիևի ապակառուցողական հայտարարություններին և նշեցին, որ խաղաղ կարգավորմանը այլընտրանք չկա:
«Ամերիկացի համանախագահը կոչ արեց զերծ մնալ արմատական հայտարարություններից, իսկ հաշվի առնելով այն հանգամանքը, որ Հայաստանը երբեք հանդես չի եկել նման հայտարարություններով և մշտապես գտնվել է կառուցողական դաշտում, լինելով խաղաղ քաղաքական կարգավորման կողմնակից, պարզ է, որ այդ գնահատականները ուղղված էին Ալիևի հասցեին»,- ասաց Շարմազանովը:
Նրա խոսքերով, Ղարաբաղյան հիմնահարցում հայկական կողմը հստակ դիրքորոշում է զբաղեցնում, և պատահական չէ, որ եվրոպական և ռուսական ԶԼՄ-ները կարևորագույն հացրերի շարքում նշում են ԼՂՀ կարգավիճակի հարցը հանրաքվեի միջոցով:
«Բոլորը համոզվեցին հայկական կողմի և ՀՀ նախագահի հայտարարությունների ճշմարտացիության մեջ այն մասին, որ կարգավիճակը կարևորագույն հարցն է»,- նշեց խմբակցության քարտուղարը:
Շարմազանովը կարծում է, որ Բաքվի «նյարդային» հայտարարությունները գալիս են նրանից, որ հարցի լուծման գործընթացը Ադրբեջանի սպասած սցենարով չի գոնւմ:
Նա կարծում է նաև, որ հիմք չկա ենթադրելու, որ հայկական կողմը հայ-թուրքական հարաբերությունների համատեքստում կենթարկվի Ղարաբաղի առնչությամբ գործադրվող ճնշմանը:
«Հայկական կողմը շատ հստակ դիրքորոշում է պահպանում: Ավելին, ՀՀ արտգործնախարար Էդվարդ Նալբանդյանը վերջերս հայտարարեց խորհրդարանում, որ Հայաստանը Թուրքիայի հետ հարաբերություններ է կառուցում ինչպես հավասարը հավասարի»,- ասաց Շարմազանովը՝ հավելելով, որ միջազգային հանրությունը նույնպես հայտարարում է Ղարաբաղյան հակամարտության խնդրի և հայ-թուրքական կարգավորման գործընթացի միջև որևէ կապի բացակայության մասին: -0-
