ԵՐԵՎԱՆ, 20 նոյեմբերի. /Նովոստի-Արմենիա/. ՀՀ վարչապետ Տիգրան Սարգսյանի մուտքը Հայաստանի Հանրապետական կուսակցություն սեփական կամքի դրսևորում է, կարծում է իշխող Հանրապետական կուսակցության խորհրդարանական խմբակցությամբ քարտուղար Գալուստ Սահակյանը:
«Այս հարցում սենսացիա փնտրել պետք չէ: Մեզ համար վարչապետի մուտքը ՀՀԿ սենսացիա չէ, այլ նրա սեփական կամքի դրսևորումը: Մենք քվեարկել ենք նրա օգտին, առաջադրել նրա թեկնածությունը վարչապետի պաշտոնում»,- ասաց Սահակյանը ուրբաթ խորհրդարանական ճեպազրույցների ընթացքում՝ մեկնաբանելով նոյեմբերի 16-ին Տիգրան Սարգսյանի մուտքը ՀՀԿ:
Միևնույն ժամանակ խմբակցության քարտուղարը նշեց, որ ՀՀԿ-ն երբեք ոչ ոքի չի առաջարկել համալրել իր շարքերը և ուժեղ կադրեր ու ներուժ ունի:
«Մենք շահագրգռված ենք մեր շարքերը նախարարներով համալրելու հարցում: Եթե որևէ մեկը դիմում է կուսակցություն մտնելու ցանկությամբ, մենք քննում ենք հարցն ու լուծում այն»,- հայտարարեց պատգամավորը:
«Մենք ուժեղ կուսակցություն ենք: Պետք չէ մտածել, որ կուսակցության հզորությունն ապահովում են վարչապետն ու նախարարները, մեզ ուժ է տալիս նախագահի ղեկավարությունը»,- նշեց նա:
ՀՀԿ-ն գրանցվել է 1991-ին։ 1990-97թթ. այն ղեկավարել է Աշոտ Նավասարդյանը։ 2000-2007թթ. կուսակցության վարչության նախագահ է դարձել կառավարության նախկին ղեկավար Անդրանիկ Մարգարյանը, ով 2000 թ.-ից զբաղեցրել է ՀՀ վարչապետի պաշտոնը: Մարգարյանի մահվանից հետո ՀՀԿ-ն ղեկավարեց Սերժ Սարգսյանը։
ՀՀԿ-ն խորհրդարանում ունի 65 մանդատ, ՀՀ ԱԺ խոսնակ Հովիկ Աբրահամյանը ևս կուսակցության անդամ է: ՀՀ կառավարության նախարարների մեծամասնությունն իշխող կուսակցության անդամ է:-0-
