ԵՐԵՎԱՆ, 18 նոյեմբերի. /Նովոստի-Արմենիա/. Ղարաբաղյան հակամարտության կարգավորումն անհնար է առանց Ղարաբաղի ուղղակի մասնակցության, հայտարարել է ՀՀ արտգործնախարար Էդվարդ Նալբանդյանը:
«Հայկական կողմը կարծում է, որ առանց ԼՂՀ ուղղակի մասնակցության համապատասխան պայմանագրի նախագծի մշակում կամ ղարաբաղյան հակամարտության լուծում հնարավոր չէ: Չի եղել համանախագահների հետ որևէ հանդիպում, որ ժամանակ Հայաստանը չբարձրացնի բանակցություններին ԼՂՀ ուղղակի մասնակցության հարցը»,- ասաց ԱԳՆ ղեկավարը ԱԺ-ում կառավարական ժամի ընթացքում:
Նրա խոսքով, Լեռնային Ղարաբաղն անուղղակի կերպով մասնակցում է բանակցություններին, քանի որ ԵԱՀԿ ՄԽ համանախագահները այցելում են ԼՂՀ և բանակցություններ են վարում երկրի ղեկավարության հետ:
Նալբանդյանը մեկ անգամ էլ հիշեցրեց, որ ղարաբաղյան հակամարտության կարգավորման շուրջ բանակցություններն անցկացվում են ԵԱՀԿ ՄԽ շրջանակներում ՝ համանախագահների՝ Ռուսաստանի, ԱՄՆ-ի և Ֆրանսիայի ներկայացուցիչների գլխավորությամբ:
«Մենք՝ Հայաստանն ու Ղարաբաղը, դրական ենք վերաբերվում այս ձևաչափին, և կարծում եմ, որ բանակցություններն այս ձևաչափում պետք է շարունակվեն: Այս տեսակետը միշտ չէ, որ կիսում է Ադրբեջանը»,- հայտարարեց Նալբանդյանը:
Ղարաբաղյան հակամարտությունը սկսվել է 1988 թվականին, երբ գերազանցապես հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին: 1991թ. դեկտեմբերի 10-ին Լեռնային Ղարաբաղում հանրաքվե անցկացվեց, որի ժամանակ մասնակիցների 99,89 տոկոսը քվեարկեց Ադրբեջանից լիովին անկախանալու օգտին:
Դրան հետևեցին Ադրբեջանի ձեռնարկած լայնածավալ ռազմական գործողությունները, որոնք հանգեցրին նրան, որ նրանք կորցրեցին վերահսկողությունը ոչ միայն Լեռնային Ղարաբաղի, այլև հարակից յոթ շրջանների նկատմամբ:
1994թ. մայիսի 12-ին զինադադարի վերաբերյալ եռակողմ համաձայնագրի կնքումից հետո հակամարտության գոտում դադարեցին ռազմական գործողությունները, որոնց արդյունքում երկու կողմից էլ եղավ շուրջ 25-30 հազար զոհ և մոտ մեկ միլիոն մարդ ստիպված լքեց բնօրրանը:
Հրադադարի ռեժիմ հաստատելու վերաբերյալ համաձայնագիրը մինչ այսօր ուժի մեջ է: 1992 թվականից ի վեր հակամարտության խաղաղ կարգավորման ուղղությամբ բանակցություններ են տարվում ԵԱՀԿ Մինսկի խմբի շրջանակներում, որի համանախագահներն են ԱՄՆ-ն, Ռուսաստանը և Ֆրանսիան:
