Այժմ Հայաստանի բուհերում ուսանում է շուրջ 6 հազար օտարերկրյա ուսանող. նախարար

ԵՐԵՎԱՆ, 10 նոյեմբերի. /Նովոստի-Արմենիա/. Այժմ Հայաստանի բուհերում ուսանում է շուրջ 6 հազար օտարերկրյա ուսանող, երեքշաբթի լրագրողներին տեղեկացրեց ՀՀ կրթության և գիտության նախարար Արմեն Աշոտյանը:

«Հայաստանում սովորող ուսանողների ցուցանիշով մենք բավականին լավ դիրք ենք զբաղեցնում աշխարհի այլ երկրների շրջանում, սակայն Հայաստանն ունի աճի մեծ ներուժ», - նշեց նա:

Աշոտյանի խոսքերով, շատ երկրներ շահագրգռված են իրենց ուսանողներին Հայաստանի բուհեր ուղարկելու կապակցությամբ: Ինչպես նշեց նախարարը, նման երկրներից է Քուվեյթը:

Աշոտյանը տեղեկացրեց, որ ՀՀ նախագահ Սերժ Սարգսյանի՝ վերջերս Քուվեյթ կատարած այցի և տեղի ունեցած հանդիպումների ժամանակ այդ երկրի ղեկավարությունը շահագրգռվածություն է հայտնել իր ուսանողներին Հայաստան ուղարկելու կապակցությամբ, մասնավորապես՝ բժշկական բուհեր:

Միաժամանակ ՀՀ կրթության և գիտության նախարարն ընդգծեց, որ անհրաժեշտ է հատուկ ուշադրություն դարձնել բուհերում կրթության որակին, քանի որ նրա կարծիքով, այս հարցը երկրի հեղինակության հարցն է:

«Մենք չենք փակի մեր աչքերը երկրի բուհերում կրթության որակի հետ կապված իրավիճակի վրա և պատշաճ կերպով կհետևենք դրան», - հայտարարեց նախարարը:-0-