Քուվեյթի ներդրումային հիմնադրամը շահագրգռված է Հայաստանի հետ համագործակցությամբ

Քուվեյթի ներդրումային հիմնադրամը շահագրգռված է Հայաստանի հետ համագործակցությամբ, Չորեքշաբթի հայտարարեց ֆոնդի տնօրեն Բադեր Մոհամեդ ալ-Սահադին Հայաստանի նախագահ Սերժ Սարգսյանի հետ հանդիպման ընթացքում։

«Քուվեյթի ներդրումային հիմնադրամի տնօրենի հետ հանդիպմանը Նախագահ Սարգսյանը նշել է, որ անկախացումից ի վեր Հայաստանը որդեգրել է շուկայական ազատ տնտեսության քաղաքականություն և որպես զարգացող երկիր պատրաստ է համագործակցություն ծավալել հիմնադրամի հետ` համապատասխան պայմաններ ստեղծելով տարբեր ներդրումային ծրագրերի հաջող իրականացման համար: Բադեր Մոհամմադ ալ-Սաադն իր հերթին նշել է, որ հիմնադրամը ներդրումային ծրագրեր է իրականացնում տարբեր զարգացող երկրներում եւ ուրախ կլինեն համագործակցություն ծավալել նաև մեր երկրի հետ»,- տեղեկացնում է երկրի ղեկավարի մամուլի ծառայությունը։

Որպես հիմնադրամի կողմից հնարավոր ներդրումային ծրագրերի իրականացման ոլորտներ առանձնացվել են էներգետիկայի, գյուղատնտեսության, անշարժ գույքի, լեռնահանքային արդյունաբերության բնագավառները: Ձեռք է բերվել պայմանավորվածություն մասնագիտացված աշխատանքային խումբ գործուղելու Քուվեյթ` հիմնադրամի հետ առավել մանրամասն քննարկելու հնարավոր համագործակցության հեռանկարները և  ներդրումային կոնկրետ առաջարկությունները:

Այցի շրջանակներում Հայաստանի նախագահը հանդիպել է նաև Քուվեյթի հայկական համայնքի ներկայացուցիչների հետ, քննարկել նրանց հետ այցի արդյունքները և ձեռքբերված պայմանավորվածությունները, Հայաստանի սոցիալ-տնտեսական զարգացման անհրաժեշտությունը, հայապահպանության և Հայաստանի ու Սփյուռքի միաբանության ապահովման հարցերը, հայ-թուրքական հարաբերությունների կարգավորման և արցախյան հիմնախնդրի հանգուցալուծման բանակցությունների գործընթացը։

Հայաստանի նախագահը երեքշաբթի երկօրյա պաշտոնական այցով մեկնել է Քուվեյթ։ Սարգսյանին դիմավորել և նրա հետ կարճատև բանակցություններ է անցկացրել Քուվեյթի շեյխ Սաբահ ալ-Ահմադ ալ- Ջաբեր ալ-Սաբահը։

Հայաստանի նախագահի գլխավորած պատվիրակության կազմում էին արտգործնախարար Էդվարդ Նալբանդյանը, ֆինանսների նախարար Տիգրան Դավթյանը, սփյուռքի նախարար Հրանուշ Հակոբյանը, մշակույթի նախարար Հասմիկ Պողոսյանը, կրթության և գիտության նախարար Արմեն Աշոտյանը, «Հայաստան-Քուվեյթ» բարեկամության խորհրդարանական խմբի նախագահ Վահան Հովհաննիսյանը, Հայաստանի արդյունաբերողների և ձեռնարկատերերի միության նախագահ Արսեն Ղազարյանը, Առևտրաարդյունաբերական պալատի նախագահ Մարտին Սարգսյանը։ -0-