Իտալական ընկերությունները հետաքրքրված են Հայաստանի երկաթուղային ոլորտի ծրագրերով

Իտալական ընկերությունները հետաքրքրված են Հայաստանի երկաթուղային ոլորտի ծրագրերով, ասաց Հայաստանում Իտալիայի արտակարգ և լիազոր դեսպան Բրունո Սկապինին ՀՀ տրանսպորտի և կապի նախարար Գուրգեն Սարգսյանի հետ հանդիպման ժամանակ։

Դեսպան Բրունո Սկապինին տեղեկացրեց, որ Իտալիայի երկաթուղային ողջ համակարգը կոորդինացնող «Իտալֆեռ» ընկերությունը հետաքրքրված է Հայաստանի երկաթուղային ոլորտում իրականացվող ծրագրերով:

Նախարար Գուրգեն Սարգսյանը հայտնեց, որ ճանապարհաշինության ոլորտում իտալական մի ընկերություն արդեն գործունեություն է ծավալում:

Համաշխարհային բանկի «Կենսական նշանակության ճանապարհների բարելավման ծրագրի» շրջանակներում  ճանապարհաշինարարական աշխատանքների որակի հսկողությունն ապահովում է իտալական IRD  և բելգիական SAFEGE խորհրդատվական կազմակերպություններից կազմված համատեղ ձեռնարկությունը:

Նախարար Սարգսյանը դեսպանին տեղեկացրեց նաև, որ ՀՀ կառավարության որոշմամբ ստեղծվել է «Երկաթուղու շինարարության տնօրինություն» փակ բաժնետիրական ընկերություն, որը կզբաղվի Իրան-Հայաստան երկաթուղու կառուցմանն առնչվող բոլոր հարցերով:-0-