Երևանը հանդես է գալիս Բելառուսի հետ տնտեսական համագործակցության ամրապնդման օգտին

Նախագահ Սերժ Սարգսյանն ուրբաթ ընդունել է Բելառուսի Հանրապետության արտաքին գործերի նախարար Սերգեյ Մարտինովին և ընդգծել երկկողմ տնտեսական համագործակցության զարգացման անհրաժեշտությունը:

«Նախագահ Սարգսյանը նշել է, որ երկկողմ քաղաքական երկխոսությունը բարձր մակարդակի վրա է, սակայն տնտեսական գործակցությունը զարգացնելու անհրաժեշտություն կա»,- հայտնում է երկրի ղեկավարի մամուլի ծառայությունը:

Սերժ Սարգսյանն ասել է, որ այդ ուղղությամբ ակտիվ աշխատելու և ջանքերը համատեղելու դեպքում հնարավոր կլինի կարճ ժամկետում զգալի արդյունքների հասնել:

Սերգեյ Մարտինովը նշել է, որ Հայաստանը Բելառուսի կարևոր գործընկերներից է:

Նրա խոսքով` երկու երկրների ղեկավարների ու կառավարությունների միջև լավ հարաբերությունները տնտեսության ոլորտում մեծածավալ և արդյունավետ ծրագրեր իրականացնելու լուրջ նախադրյալներ են ստեղծում:

Կողմերը խոսել են, մասնավորապես, մեքենաշինության, բարձր տեխնոլոգիաների բնագավառներում համագործակցության հնարավորությունների մասին:

Բելառուս-Հայաստան առևտրատնտեսական համագործակցությունը վերջին տարիներին զարգանում է դինամիկ կերպով, փոխադարձ առևտրաշրջանառությունը 2001-ից 2008 թթ.-ին կավելանա ավելի քան 9 անգամ( 2,9 մլն-ից 28,2 մլն ԱՄն դոլար):  

Հայաստանը ԱՊՀ երկրների հետ Բելառուսի հանրապետության առևտրաշրջանառության մեջ 10-րդ տեղն է զբաղեցնում: 2009 թ.-ի հունվար-օգոստոսին առևտրաշրջանառությունը 15,3 մլն ԱՄն դոլար է կազմել և 2008 թ.-ի միևնույն ժամանակահատվածի համեմատ աճել ավելի քան 12 տոկոսով: -0-