ԵՐԵՎԱՆ, 27 հոկտեմբերի. /Նովոստի-Արմենիա/. Թուրքիայի խորհրդարանը կփորձի ձգձգել հայ-թուրքական արձանագրությունների վավերացումը մինչև հաջորդ տարվա ապրիլ, երեքշաբթի մամուլի ասուլիսի ժամանակ հայտարարեց Ազգային և ռազմավարական ուսումնասիրությունների հայկական կենտրոնի տնօրեն Ռիչարդ Գիրագոսյանը:
«Թուրքիան կձգձգի արձանագրությունների վավերացումը մինչև ապրիլի 24-ը՝ Հայոց ցեղասպանության 95-ամյա տարելիցը՝ լրացուցիչ դիվիդենտներ ստանալու նպատակով», - ասաց փորձագետը:
Միաժամանակ Գիրագոսյանը ընդգծեց, որ վավերացումից հրաժարվելու դեպքում Թուրքիան կարող է հայտնվել բավականին ոչ ձեռնտու իրավիճակում:
«Ինչպես Հայաստանը, այնպես էլ միջազգային հանրությունը կկորցնի վստահությունը Թուրքիայի նկատմամբ», - հայտարարեց Գիրագոսյանը:
Նա նաև նշեց, որ ինչպես Հայաստանի, այնպես էլ Թուրքիայի համար ստորագրումից մինչև վավերացում ընկած ժամանակահատվածն ամենաբարդն ու պատասխանատուն է:
Հայաստանի և Թուրքիայի արտգործնախարարները հոկտեմբերի 10-ին Ցյուրիխի համալսարանում ստորագրեցին «Դիվանագիտական հարաբերությունների հաստատման մասին արձանագրությունը» և «Երկկողմ հարաբերությունների զարգացման մասին արձանագրությունը»:
Փաստաթղթերը ստորագրումից հետո պետք է հավանության արժանանան երկու երկրների խորհրդարանների կողմից:
Հայաստանի և Թուրքիայի միջև չկան դիվանագիտական հարաբերություններ, իսկ 1993-ից, պաշտոնական Անկարայի նախաձեռնությամբ, փակ է հայ-թուրքական սահմանը։ Երկու եկրների միջև բարդ հարաբերությունները պայմանավորված են մի շարք հանգամանքներով, որոնք կապված են, մասնավորապես, Անկարայի՝ ադրբեջանական դիրքորոշման պաշտպանությամբ ղարաբաղյան հարցում, ինչպես նաև Թուրքիայի սուր արձագանքի հետ 1915 թվականին Օսմանյան կայսրությունում Հայոց ցեղասպանության միջազգային ճանաչման հետ կապված: -0—
