Սուրբ թարգմանչաց տոնը և հայ մեծանուն բանաստեղծ Հովհաննես Թումանյանի 140-ամյակը հինգշաբթի կնշեն Հայաստանի խորհրդարանում «Ազգային Ժողովի բաց դռներ» ծրագրի շրջանակներում, չորեքշաբթի տեղեկացնում է խորհրդարանի մամուլի ծառայությունը։
«Միջոցառումների անցկացման նախաձեռնողը Հայ Առաքելական եկեղեցու Արարատյան թեմն է և Հայաստանի Հանրապետական կուսակցության կանանց խորհուրդը»,- ասվում է հաղորդագրության մեջ։
Հանդիսավոր միջոցառումները կավարտվեն խաչապտույտով, որը կառաջնորդեն ՀՀ ԱԺ նախագահ Հովիկ Աբրահամյանը և Արարատյան Հայրապետական թեմի առաջնորդական փոխանորդ Տեր Նավասարդ արքեպիսկոպոս Կճոյանը:
Ինչպես ասվում է հաղորդագրության մեջ, Խաչապտույտը սկիզբ կառնի Ազգային ժողովի բակից և կավարտվի Աբովյան փողոցում գտնվող Ս.Կաթողիկե եկեղեցու բակում, որտեղ մայրաքաղաքի բնակիչներն ու հյուրերը կմասնակցեն շուրջպարի:
Հայաստանը միակ երկիրն է, որն ունի Թարգմանիչների տոն: Սուրբ թարգմանիչների՝ Մեսրոպ Մաշտոցի, Եղիշեի, Մովսես Քերթողի, Ս. Գրիգոր Նարեկացու, Ս. Ներսես Շնորհալու, Ս. Գրիգոր Տաթևացու տոնը հայ ժողովրդի ամենաբաղձալի և ամենասիրելի ազգային-եկեղեցական տոներից է։
Պատմությանը հայտնի է մոտ 100 թարգմանիչ, ովքեր եղել են հինգերորդ դարի սկզբում հայկական այբուբենը ստեղծած Սուրբ Մեսրոպ Մաշտոցի և կաթողիկոս Սբ. Սահակ Պարթևի աշակերտներն։ Նրանց գործունեության հետ է կապված Աստվածաշնչի թարգմանությունը հայերեն լեզվով։
Մեծանուն հայ գրող, հասարակական գործիչ Հովհաննես Թադևոսի Թումանյանը ծնվել է 1869-ի փետրվարի 7-ին Լոռու Դսեղ գյուղում, հոգևորականի ընտանիքում։ 1878-83թթ. Թումանյանը ստանում է սկզբնական կրթություն Ջալալօղլու դպրոցում (Ստեփանավան), ապա տեղափոխվում է Թիֆլիսի Ներսեսյան վարժարան։
Հովհաննես Թումանյանի թանգարանը բացվել է 1953-ին։ Թանգարանի հիմնադիրն ու առաջին տնօրենը եղել է պոետի դուստր Ա. Թումանյանը։
Թանգարանում հավաքված է Թումանյանի անձնական գրադարանը՝ շուրջ 8000 կտոր, որոնք նվիրված են կովկասագիտությանը, հայագիտությանը, պատմությանը, մշակույթին, կրոններին և տարբեր ժողովուրդների բանահյուսությանը։
Ցուցադրվում են ձեռագրերի բազմաթիվ պատճեներ, լուսանկարներ, Ռոտ-տերի, Գ. Երիցյանի, Գ. Խանջյանի, Ա. Գրիգորյանի Թումանյանի ստեղծագործությունների ձևավորումների բնօրինակները։ Այստեղ է գտնվում նաև Թումանյանի լիբրետտոյով «Ալմաստ» օպերայի բեմական ձևավորման մի մասը՝ Մ. Սարյանի ձևավորմամբ։—0-
