ԵՐԵՎԱՆ, 9 հոկտեմբերի. /Նովոստի-Արմենիա/. Ռուսաստանն իր վրա կվերցնի ՀԱՊԿ արագ արձագանքման հավաքական ուժերի տեխնիկական սպառազինման ֆինանսավորումը, հայտարարեց Հայաստանի ազգային անվտանգության խորհրդի քարտուղար Արթուր Բաղդասարյանը Պաշտպանության նախարարության՝ պաշտպանական ոլորտի բարեփոխումներին նվիրված խորհրդակցության ժամանակ։
«ՀԱՊԿ շրջանակներում արդյունավետ գործընթացներ են տեղի ունենում, և մեկ շաբաթ առաջ Բելառուսում ՀԱՊԿ ազգային անվտանգության խորհուրդների քարտուղարների կոմիտեի նիստում որոշում է ընդունվել Կազմակերպության շրջանակներում նպատակային պետական ծրագրի ստեղծման մասին, և ռուսաստանյան կողմն իր վրա կվերցնի ԱԱՀՈՒ-ն ժամանակակից տեխնիկայով և հանդերձանքով սպառազինելու պատասխանատվությունը»,- հայտնեց նա։
Բացի այդ, Բաղդասարյանի խոսքերով, Բելառուսի նիստի ընթացքում պայմանավորվածություն է ձեռք բերվել ՀԱՊԿ շրջանակներում ռազմատնտասական համագործակցության ընդլայնման վերաբերյալ։
Ըստ նրա՝ այդ պայմանավորվածությունը լավ բազա կծառայի ՀԱՊԿ անդամ-երկրների ռազմատնտեսական համալիրի ոլորտում համատեղ ձեռնարկությունների ստեղծման համար։
Արագ արձագանքման հավաքական ուժերի ստեղծման մասին որոշումն ընդունվել է ՀԱՊԿ Հավաքական անվտանգության խորհրդի փետրվարի 4-ի մոսկովյան արտահերթ նստաշրջանի ժամանակ։
ԱԱՀՈՒ-ի ստեղծման հիմնական նպատակների թվում են ՀԱՊԿ երկրների անվտանգության հետագա ամրապնդումը՝ գոյություն ունեցող և պոտենցիալ սպառնալիքների, այդ թվում նաև ահաբեկչության, ծայրահեղականության, թմրանյութերի ապօրինի շրջանառության ֆոնի ներքո՝ հաշվի առնելով համաձայնեցված և օպերատիվ արձագանքման միջոցով բնական և տեխնածին արտակարգ իրավիճակների կանխարգելումն ու չեզոքացումը, միջազգային խաղաղության և անվտանգության պահպանման գործում ՀԱՊԿ-ի արդյունավետ մասնակցության ապահովումը։-0-
