Երևանի կենտրոնում այրում են հայ-թուրքական արձանագրությունները

«Միացում» ազգային նախաձեռնությունը հինգշաբթի Երևանում կազմակերպել է հայ-թուրքական արձանագրություններն այրելու ակցիան:

Երիտասարդական մետրոյի հարևանությամբ գտնվող Ավետիք Իսահակյանի արձանի մոտ բոլոր այն անձինք, ովքեր դժգոհ են Հայաստանի և Թուրքիայի միջև հարաբերությունների կարգավորման արձանագրություններից, կարող են հրապարակավ այրել դրանք:

Նախապես ստորագրելով մի թղթի վրա, որը վերնագրված է «Ես դեմ եմ հայ-թուրքական արձանագրություններին ու մադրիդյան սկզբունքներին, ակցիայի մասնակիցները փոքրիկ բաժակում այրում են թղթիկներ, որոնց վրա գրված է «հայ-թուրքական արձանագրություններ» և «մադրիդյան սկզբունքներ»:

«Ես դեմ եմ այդ փաստաթղթերին: Ինձ համար միևնույն չէ իմ երկրի ճակատագիրը, և այդ պատճառով էլ ես որոշեցի իմ կարծիքը հայտնել թեկուզ այս ձևով»,- ասաց ակցիային մասնակցող տղամարդկանցից մեկը:

Կազմակերպիչներից մեկի խոսքով, տարբեր սերնդի ավելի քան 200 ներկայացուցիչ արդեն մասնակցել է իրենց նախաձեռնությանը:

Ի զարմանս կազմակերպիչների, ոստիկանությունը ոչ մի անգամ դեռ չի անհնագստացրել իրենց:

«Մենք մեր սահմանադրական իրավունքն ենք կատարում, և ոչ ոք իրավունք չունի մեզ անհանգստացնելու»,- ասա կազմակերպիչներից մեկը:

Ինչպես «Նովոստի-Արմենիա» գործակալությանը հայտնեցին Ոստիկանությունից, «Միացում»-ը տեղեկացրել է քաղաքապետարանին իրենց նախաձեռնության անցկացման մասին, և ոստիկանությունը միայն հետևում է դրա ընթացքին, որպեսզի հակահասարակական քայլեր թույլ չտա կազմակերպիչների կողմից:

«Ոստիկանության աշխատակիցները կարող են հանգիստ հետևել ակցիայի ընթացքին, որպեսզի անվայել գործողություններ թույլ չտան, և ակցիան արգելելու իրավունք չունեն»,- տեղեկացրեց գործակալության զրուցակիցը:

«Այս նախաձեռնությունն ուղղված է հայ-թուրքական արձանագրությունների ու մադրիդյան սկզբունքների դեմ, որոնք հայկական պետության տարածքների և, ընդհանրապես, հայության կորուստ, ինչպես նաև ողջ պետականության կորուստ են նախատեսում»,- «Նովոստի-Արմենիա» գորչծակալութանը հայտնեց նախաձեռնության կազմակերպիչ, «Ժառանգություն» կուսակցությունից ԱԺ պատգամավոր Զարուհի Փոստանջյանը:

Հայ ընդդիմադիրը կարծում է, որ հայ-թուրքական արձանագրությունները ղարաբաղյան հակամարտության կարգավորման նախապայմաններ են պարունակում:

Մադրիդյան սկզբունքների թվում են, մասնավորապես, Լեռնային Ղարաբաղի կարգավիճակի սահմանումը՝ ազատ կամարտահայտության միջոցով, Լեռնային Ղարաբաղի և Հայաստանի միջև ցամաքային կապի ապահովումը, անվտանգության երաշխիքների տրամադրումը, վերահսկվող տարածքներից զորքի դուրսբերումը:

Փոստանջյանը հայտնեց, որ ակցիան կկազմակերպվի քաղաքի տարբեր մասերում այնքան ժամանակ, քանի դեռ «վերջ չի դրվել այդ փաստաթղթերին»:

Առաջիկա օրերին նման ակցիաներ են ծրագրվում մետրոյի «Բարեկամություն» և «Գարեգին Նժդեհ» կայանների մոտ:

Հայաստանի և Թուրքիայի միջև բացակայում են դիվանագիտական հարաբերությունները, իսկ 1993 թվականից պաշտոնական Անկարայի նախաձեռնությամբ փակվել է հայ-թուրքական սահմանը:

Թուրքիան առաջ է քաշում մի շարք նախապայմաններ՝ երկկողմ հարաբերությունների հաստատման համար, մասնավորապես, Հայաստանի կողմից Առաջին համաշխարհային պատերազմի տարիներին Օսմանյան կայսրությունում Հայոց ցեղասպանության միջազգային ճանաչման քաղաքականությունից հրաժարվելը, երբ սրի էր քաշվել շուրջ մեկուկես միլիոն հայ, Հայաստանի կողմից Թուրքիայի սահմանների ճանաչումը։

Հարաբերություններում առաջին տեղաշարժերը նկատվեցին 2008 թ.-ի սեպտեմբերի 6-ին, երբ Թուրքիայի նախագահ Աբդուլա Գյուլը ՀՀ նախագահ Սերժ Սարգսյանի հրավերով առաջին անգամ այցելեց Երևան՝ 2010 թ.-ի աշխարհի առաջնության ընտրական փուլի շրջանակներում Հայաստանի և Թուրքիայի հավաքականների միջև ֆուտբոլային հանդիպումը դիտելու նպատակով։ Այցի ընթացքում երկու պետությունների ղեկավարները քննարկեցին երկկողմ հարաբերությունների հաստատման հնարավորությունները։-0-