Թուրքիան չի կասկածում, որ կստորագրվեն Հայաստանի հետ հարաբերություններ կարգավորող փաստաթղթերը
Թուրքիայի արտգործնախարար Ահմեդ Դավութօղլուն հինգշաբթի Անկարայում հայտարարել է լրագրողներին, որ չի կասկածում, որ կստորագրվեն Հայաստանի հետ հարաբերություները կարգավորող արձանագրությունները, որոնց ստորագրումը նախատեսված է հոկտեբերի 10-ին Ցյուրիխում:
Հայաստանի և Թուրքիայի միջև բացակայում են դիվանագիտական հարաբերությունները, իսկ 1993 թվականից պաշտոնական Անկարայի նախաձեռնությամբ փակվել է հայ-թուրքական սահմանը:
Թուրքիան առաջ է քաշում մի շարք նախապայմաններ՝ երկկողմ հարաբերությունների հաստատման համար, մասնավորապես, Հայաստանի կողմից Առաջին համաշխարհային պատերազմի տարիներին Օսմանյան կայսրությունում Հայոց ցեղասպանության միջազգային ճանաչման քաղաքականությունից հրաժարվելը, երբ սրի էր քաշվել շուրջ մեկուկես միլիոն հայ, Հայաստանի կողմից Թուրքիայի սահմանների ճանաչումը։
Օգոստոսի 31-ին Թուրքիայի և Հայաստանի արտգործնախարարությունները, ինչպես նաև Շվեյցարիայի արտաքին գործերի դեպարտամենտը հայտարարեցին, որ պայմանավորվածություն է ձեռք բերվել քաղաքական խորհրդակցություններ սկսել բանակցությունների ընթացքում շվեյցարական միջնորդությամբ նախնական ստորագրած երկու արձանագրությունների` «Երկու երկրների միջև դիվանագիտական հարաբերությունների հաստատման մասին արձանագրության» և «Երկկողմ հարաբերությունների զարգացման մասին արձանագրության» շուրջ»: Ներքաղաքական խորհրդակցությունները կավարտվեն վեց շաբաթվա ընթացքում, ինչից հետո երկու արձանագրություն կստորագրվի և կներկայացվի համապատասխան խորհրդարաններին վավերացման համար:
«Թուրքիան չի կասկածում, որ փաստաթղթերը կստորագրվեն: Ես օր չեմ նշի: Եկեք սպասենք Շվեյցարիայից արված հայտարարությանը»,- ասել է Դավիթօղլուն, հաղորդում է ՌԻԱ Նովոստին:
Նա նաև հույս է հայտնել, որ ՀՀ նախագահ Սերժ Սարգսյանը հաջորդ շաբաթ կայցելի Թուրքիա՝ դիտելու երկու երկրի ֆուտբոլային հավաքականների՝ 2010թ. ֆուտբոլի աշխարհի առաջնության նախընտրական շրջանակներում անցկացվող հանդիպումը:
«Հայաստանի նախագահը պետք է այցելի առանց ինչ-որ նախնական պայմաններ առաջադրելու»,- ասել է Թուրքիայի ԱԳՆ ղեկավարը՝ հիշեցնելով, որ Թուրքիայի նախագահ Աբդուլա Գյուլը նախորդ տարի Հայաստան էր ժամանել ՀՀ նախագահի հրավերով: Ֆուտբոլային հանդիպման ավարտից հետո Գյուլը Սարգսյանին հրավիրել էր պատասխան հանդիպումը 2009թ. հոկտեմբերի 19-ին միասին Թուրքիայում դիտելու:-0-
