Ռուսաստանի և ԱՊՀ հայկական համայնքները Հայաստանի նախագահ Սերժ Սարգսյանի հետ հանդիպման ընթացքում աջակցել են նախագահի՝ Թուրքիայի հետ դիվանագիտական հարաբերությունները վերականգնելու մտադրությանը, հինգշաբթի «ՌԻԱ Նովոստիին» ասել է «Դոնի Նոր Նախիջևանի հայկական համայնքի» գործադիր տնօրեն Գուրգեն Ղազախեթյանը։
Հանդիպումն անցկացվել է չորեքշաբթի Դոնի Ռոստովում Սարգսյանի՝ Դոնի մայրաքաղաք այցելության ժամանակ։ «Հանդիպումն անցել է շատ լավ և շատ բարձր մակարդակում։ Բազմաթիվ կարծիքներ են հնչել նախատեսվող համաձայնագրերի վերաբերյալ։ Բայց հիմնականում կար միասնական մի կարծիք, որ անպայման պետք է պայմանագիր ստորագրել և բացել սահմանը»,- պատմել է Ղազախեթյանը։ Նա պարզաբանեց, որ ռոստովյան համայնքի կարծիքով՝ հաջող բանակցությունների դեպքում «կբացվի կյանքի ճանապարհը»։
«Ներկայումս բեռնափոխադրումներն իրականացվում են Վրաստանի տարածքով, և մեծ գումարներն են նրանք դրանով աշխատում։ Դա ավելի էժան կլինի Հայաստանի, նրա տնտեսության, բիզնեսի համար»,- պատմել է գործակալության զրուցակիցը։
Ռոստովում հանդիպման նախօրեին որոշ ԶԼՄ-ներ հայտնել էին, թե Դոնի մայրաքաղաք այցի ժամանակ հայկական համայնքների և սփյուռքի ներկայացուցիչները նախատեսում են Հայաստանի նախագահին փոխանցել բողոքի հայտարարություններ՝ նախատեսվող համաձայնագրերի դեմ։
«Նման բան բացարձակապես չի եղել։ Ես չգիտեմ, թե դա ով է տարածում»,- ասել է ռոստովյան համայնքի ղեկավարը։
Նա պարզաբանել է, որ հանդիպմանը ներկա է եղել մոտ 300 մարդ՝ «Ռուսաստանի հայերի միության», Ուկրաինայի, Բելառուսի համայնքների պատվիրակություններ և Ռուսաստանի հարավային տարածաշրջանների հայկական համայնքների ներկայացուցիչներ։
Հայաստանի և Թուրքիայի միջև բացակայում են դիվանագիտական հարաբերությունները, իսկ 1993 թվականից պաշտոնական Անկարայի նախաձեռնությամբ փակվել է հայ-թուրքական սահմանը: Թուրքիան առաջ է քաշում մի շարք նախապայմաններ՝ երկկողմ հարաբերությունների հաստատման համար, մասնավորապես, Հայաստանի կողմից Առաջին համաշխարհային պատերազմի տարիներին Օսմանյան կայսրությունում Հայոց ցեղասպանության միջազգային ճանաչման քաղաքականությունից հրաժարվելը, երբ սրի էր քաշվել շուրջ մեկուկես միլիոն հայ, Հայաստանի կողմից Թուրքիայի սահմանների ճանաչումը։
Օգոստոսի 31-ին Թուրքիայի և Հայաստանի արտգործնախարարությունները, ինչպես նաև Շվեյցարիայի արտաքին գործերի դեպարտամենտը հայտարարեցին, որ պայմանավորվածություն է ձեռք բերվել քաղաքական խորհրդակցություններ սկսել բանակցությունների ընթացքում շվեյցարական միջնորդությամբ նախնական ստորագրած երկու արձանագրությունների` «Երկու երկրների միջև դիվանագիտական հարաբերությունների հաստատման մասին արձանագրության» և «Երկկողմ հարաբերությունների զարգացման մասին արձանագրության» շուրջ»: Ներքաղաքական խորհրդակցությունները կավարտվեն վեց շաբաթվա ընթացքում, ինչից հետո երկու արձանագրություն կստորագրվի և կներկայացվի համապատասխան խորհրդարաններին վավերացման համար: --0—
