Հատուկ քննչական ծառայությունում ավարտվել է բռնությամբ զուգորդված պաշտոնեական լիազորություններն անցնելու համար ճանապարհային ոստիկանության տեսուչների մասով քրեական գործի նախաքննությունը, հաղորդում է ՀՀ գլխավոր դատախազության մամուլի ծառայությունը:
Տեղեկատվության համաձայն՝ ՀՀ ճանապարհային ոստիկանության աշխատակիցներ, կրտսեր լեյտենանտներ Ավագյանն ու Մելքոնյանը, իրականացնելով իրենց ծառայողական պարտականությունները, ճանապարհային երթևեկության կանոնների խախտում թույլ տալու համար Սևան-Գավառ ավտոճանապարհին կանգնեցրել են Օհանյանին պատկանող ԶԻԼ-130 մակնիշի բեռնատար ավտոմեքենան, ապա բեռնատարի կցորդիչն անջատելու հարցի շուրջ անհիմն վիճաբանության մեջ են մտել վերջինիս ազգական` Գեղարքունիք մարզի Կարմիր գյուղի բնակիչ Մկրտչյանի հետ:
«Այդ ընթացքում լեյտենանտ Ավագյանը, ակնհայտորեն դուրս գալով «Ոստիկանության մասին» ՀՀ օրենքով սահմանված իր լիազորությունների շրջանակից, հայհոյել է Մկրտչյանին և բռունցքով հարվածել նրա գլխին», - նշեցին մամուլի ծառայությունից:
Տեղեկատվության մեջ նշվում է, որ տեսնելով առաջացած քաշքշուկը` տեսուչ Մելքոնյանը միացել է Ավագյանին և նրա հետ ծեծի ենթարկել Մկրտչյանին` վերջինիս պատճառելով մարմնական վնասվածքներ:
«Նախաքննությամբ ձեռք բերված ապացույցների հիման վրա Ավագյանին ու Մելքոնյանին մեղադրանք է առաջադրվել ՀՀ քրեական օրենսգրքի 309-րդ հոդվածի 2-րդ մասով՝ պաշտոնեական լիազորություններն անցնելը՝ բռնությամբ զուգորդված», - տեղեկացրեցին Գլխավոր դատախազությունից:
Նախաքննության օրինականության նկատմամբ հսկողություն իրականացնող դատախազը հաստատել է մեղադրական եզրակացությունը:
Քրեական գործն ուղարկվել է Գեղարքունիքի մարզի ընդհանուր իրավասության դատարան` ըստ էության քննելու համար:-0-
