ԵՐԵՎԱՆ, 30 սեպտեմբերի. /Նովոստի-Արմենիա/. Հայաստանի նախագահ Սերժ Սարգսյանի համահայկական շրջայցն աննախադեպ ակցիա է, որը կարելի է միայն ողջունել, կարծում է Ֆինանսավարկային և բյուջետային հարցերի խորհրդարանական մշտական հանձնաժողովի նախագահ Գագիկ Մինասյանը։
«Հայաստանի նախագահի համահայկական շրջայցն աննախադեպ ակցիա և առաքելություն է, որը կարելի է միայն ողջունել։ Առաջին անգամ Հայաստանի նախագահը կայցելի Սփյուռք՝ համահայկական նշանակության հարցերի քննարկման նպատակով»,- չորեքշաբթի մամուլի ասուլիսում հայտարարեց Մինասյանը։
Ինչպես նշեց պատգամավորը, այցի ընթացքում Հայաստանի նախագահը հանդիպումներ չի անցկացնի տեղական իշխանությունների ներկայացուցիչների հետ և կսահմանափակվի բացառապես հայկական համայքների հետ հանդիպումներով։ Ինչպես կարծում է Մինասյանը, դա ևս մեկ անգամ հաստատում է, որ Հայաստանում կարևորում են սփյուռքը և ողջ ազգին առնչվող գործընթացների վերաբերյալ նրա կարծիքը։
Հանձնաժողովի նախագահի կարծիքով՝ հայկական համայնքներում ցանկանում են լսել Հայաստանի դիրքորոշումը պետության առաջին դեմքի շուրթերից, և շատ կարևոր է, որպեսզի սփյուռքահայության ներկայացուցիչներն իրենց տեսակետները հայտնեն և իրենց հուզող հարցերն ուղղեն հայկական պետության ղեկավարին։
Ներկայումս Հայաստանի և Թուրքիայի միջև չկան դիվանագիտական հարաբերություններ, իսկ 1993-ից, պաշտոնական Անկարայի նախաձեռնությամբ, փակ է հայ-թուրքական սահմանը։
Երկու եկրների միջև բարդ հարաբերությունները պայմանավորված են մի շարք հանգամանքներով, որոնք կապված են, մասնավորապես, Անկարայի՝ ադրբեջանական դիրքորոշման պաշտպանությամբ ղարաբաղյան հարցում, ինչպես նաև Թուրքիայի սուր արձագանքի հետ 1915 թվականին Օսմանյան կայսրությունում Հայոց ցեղասպանության միջազգային ճանաչման հետ կապված։
Թուրքիայի և Հայաստանի արտգործնախարարությունները, ինչպես նաև Շվեյցարիայի արտաքին գործերի դեպարտամենտը հայտարարեցին, որ պայմանավորվածություն է ձեռք բերվել քաղաքական խորհրդատվություններ սկսել բանակցությունների ընթացքում շվեյցարական միջնորդությամբ նախնական ստորագրած երկու արձանագրությունների` «Երկու երկրների միջև դիվանագիտական հարաբերությունների հաստատման մասին արձանագրության» և «Երկկողմ հարաբերությունների զարգացման մասին արձանագրության» շուրջ»: Ներքաղաքական խորհրդատվությունները կավարտվեն վեց շաբաթվա ընթացքում, ինչից հետո երկու արձանագրություն կստորագրվի և կներկայացվի համապատասխան խորհրդարաններին վավերացման համար:
