ՆԱՏՕ-ի հատուկ կոմիտեի նիստը կանցկացվի Երևանում
25.09.2009,
16:02
ՆԱՏՕ-ի հատուկ կոմիտեի նիստը կանցկացվի Երևանում
ԵՐԵՎԱՆ, 25 սեպտեմբերի. /Նովոստի-Արմենիա/. Սեպտեմբերի 28-30-ը Երևանում կանցկացվի ՆԱՏՕ-ի հատուկ կոմիտեի նիստը, ուրբաթ «Նովոստի-Արմենիա» գործակալությանը հայտնեցին ՀՀ Ազգային անվտանգության ծառայության մամուլի կենտրոնից:
«Առաջիկա նիստը նվիրված է ահաբեկչության, ծայրահեղականության, անօրինական գաղթի և դրա հետ կապված կազմակերպված հանցավորությանն առնչվող խնդիրներին, ինչպես նաև արտաքին կապերի կառավարման և ՆԱՏՕ-ի հետ համագործակցության հարցերին»,- ասվում է հաղորդագրության մեջ:
Նիստին ՆԱՏՕ-ի անդամ 21 երկրից կժամանի 32 ներկայացուցիչ: Նիստը կազմակերպվել է ՆԱՏՕ-ի հատուկ կոմիտեի և ՀՀ ազգային անվտանգության ծառայության կողմից:
Նիստի աշխատանքներին հրավիրված են ՊՆ, Ոստիկանության, ԱԳՆ, ԱԻՎ և ՀՀ Ազգային անվտանգության խորհրդի ներկայացուցիչներ: -0-