Կայծակի հարվածը մի քանի ժամով ընդհատել է երկաթուղային հաղորդակցությունը Հայաստանի հյուսիսում

ԵՐԵՎԱՆ, 15 սեպտեմբերի. /Նովոստի-Արմենիա/. Բարձր լարման սնուցման էլեկտրական լարին հասած կայծակի հարվածը մի քանի ժամով ընդհատել է երկաթուղային հաղորդակցությունը Անի կայարանի մոտակայքում, հայտնում է հանրապետության Փրկարար ծառայությունը:

Միջադեպը տեղի է ունեցել անցյալ կիրակի: Գյումրի-Երևան գնացքի անցնելու ժամանակ. կայծակը հարվածել է բարձր լարման սնուցման էլեկտրական լարին ու կտրել այն: Ընդ որում լարն ընկել է գնացքի մոտակայքում` վտանգ առաջացնելով ուղևորների համար:

Շիրակի մարզային փրկարարական վարչության պետի ձեռնարկած գործողությունների արդյունքում երկաթգծի համապատասխան հատվածի էլեկտրական սնուցումը դադարեցվել է:

Տեղում պարզվել է, որ կայծակի հետևանքով տուժածներ չկան, սակայն Գյումրի-Երևան գնացքում գտնվող մոտ 200 ուղորները հոգեբանական լարված վիճակում են եղել:

Խուճապը կանխելու նպատակով փրկարարների կողմից տարվել են բացատրական աշխատանքներ, սահմանափակվել է մարդկանց մուտքը վթարված հատված: Գնացքների երթևեկությունը վերակնգնվել է շուրջ 2,5 ժամ հետո: -0-