ՀՀ ֆինանսների նախարարը կմասնակցի ԱՊՀ անդամ-երկրների ֆինանսների նախարարների մշտապես գործող խորհրդակցության երրորդ նիստին

ՀՀ ֆինանսների նախարար Տիգրան Դավթյանը կմեկնի Մոսկվա՝ ԱՊՀ անդամ երկրների ֆինանսների նախարարների մշտապես գործող խորհրդակցության երրորդ նիստին մասնակցելու նպատակով, հաղորդում է ՀՀ ֆինանսների նախարարության մամուլի ծառայությունը:

Նիստի ընթացքում կքննարկվի երկու հարց՝ ԱՊՀ երկրների կառավարությունների դիրքորոշումները միջազգային ֆինանսական ճգնաժամի բացասական հետևանքների հաղթահարման ուղիների վերաբերյալ հարցը և միասնական դիրքրոշումը, որով ԱՊՀ երկրները հանդես կգան սեպտեմբերի 24-25-ը ԱՄՆ Պիցբուրգ քաղաքում  կայանալիք «G-20»-ի անդամ երկրների ղեկավարների գագաթնաժողովում:

Նիստին կմասնակցեն Համագործակցության պետությունների կենտրոնական բանկերի (ազգային) ղեկավարներն ու էկոնոմիկայի նախարարները:

ԱՊՀ Գործադիր կոմիտեի մամուլի ծառայության տեղեկատվության համաձայն՝ ողջույնի խոսքով նիստի մասնակիցներին կդիմի ՌԴ կառավարության ղեկավարի տեղակալ, ՌԴ ֆինանսների նախարար Ալեքսեյ Կուդրինը: Համագործակցության երկրների ֆինանսների նախարարները ելույթ կունենան ԱՊՀ պեությունների սոցիալտնտեսական իրավիճակի և ձեռանրկվելիք հակաճգնաժամային միջոցների վերաբերյալ տեղեկատվությամբ:

Նիստի մասնակիցները կքննարկեն համաշխարհային ֆինանսատնտեսական ճգնաժամի հետևանքների հաղթահարմանն ուղղված ԱՊՀ պետությունների համատեղ միջոցների իրագործման ծրագիրը, որը պատրաստել է ՌԴ ֆինանսների նախարարությունը՝ Համագործակցության պետությունների առաջարկությունների հիման վրա: Նիստի ընթացքում մշակված Համատեղ միջոցառումների ծրագրի մասին Ալեքսեյ Կուդրինը կզեկուցի 2009 թ.-ի հոկտեմբերի 9-ին Քիշնևում կայանալիք Պետությունների ղեկավարների խորհրդի նիստի ժամանակ:

ԱՊՀ անդամ երկրների ֆինանսների նախարարների մշտապես գործող խորհրդակցության նիստերն անցկացվում են ԱՊՀ պետությունների ղեկավարների խորհրդի 2008 թ.-ի հոկտեմբերի 10-ի որոշմամբ: Առաջին նիստը տեղի է ունեցել 2008 թ.-ի հոկտեմբերի 21-ին, երկրորդը՝ 2009 թ.-ի մարտի 31-ին՝ Համագործակցության պետությունների կենտրոնական բանկերի (ազգային) ղեկավարների և էկոնոմիկայի նախարարների մասնակցությամբ:-0-