Հայկական եկեղեցին նախաձեռնել Է դպրոցներում իրականացնել «Սբ. Պատարագը աշակերտի շուրթերով» ծրագիրը

Ամենայն Հայոց Գարեգին Բ Կաթողիկոսի օրհնությամբ և ՀՀ կրթության և գիտության նախարար Արմեն Աշոտյանի աջակցությամբ Մայր Աթոռ Սուրբ Էջմիածնի Քրիստոնեական դաստիարակության կենտրոնը հանրակրթական բոլոր դպրոցներում նախաձեռնել է «Սուրբ Պատարագն աշակերտի շուրթերով՚ ծրագիրը», «Նովոստի-Արմենիա» գործակալությանը հայտնեցին Սբ. Էջմիածնի տեղեկատվական համակարգից:

Ծրագիրը, որի նպատակն է աշակերտներին հաղորդակից դարձնել Սուրբ Պատարագի խորհրդին և երգեցողությանը, իրականացվելու է երեք փուլերով` տարածաշրջանային, մարզային և հանրապետական:

Հայոց Եկեղեցու թեմերի, տեղական ինքնակառավարման մարմինների կրթության բաժինների և նրանց կողմից լիազորված անձանցից ձևավորված տարածաշրջանային հանձնախմբերը, մասնակցելով միջոցառումներին, տարածաշրջանից ընտրելու են լավագույն դպրոցը:

Հաղթող ճանաչված դպրոցները մասնակցելու են մարզային փուլին, ապա հանրապետական փուլին` եզրափակիչ եռօրյա մրցույթ-փառատոնին, որն անցկացվելու է Մայր Աթոռ Սուրբ Էջմիածնում:

Եզրափակիչ փուլի ավարտին ընտրվելու են հաղթողներ «Լավագույն սցենար», «Լավագույն կատարում՚», «Լավագույն բեմադրություն» անվանակարգերում, իսկ գլխավոր` «Հայրապետական մրցանակը» շնորհվելու է լավագույն միջոցառում ներկայացրած դպրոցին:-0-