Հայ ոստիկանը մեղադրվում է 2008 թ.-ի մարտի 1-ի դեպքերի ժամանակ պաշտոնի չարաշահման մեջ

ՀՀ ոստիկանության աշխատանկցին մեղադրանք է ներկայացվել 2008 թ.-ի մարտի 1-ի զանգվածային անկարգությունների ժամանակ պաշտոնի չարաշահման համար, հայտնում է Գլխավոր դատախազության մամուլի ծառայությունը:

2008թ. փետրվարի 20-ից Երևանի կենտրոնում, ՀՀ նախկին նախագահ Լևոն Տեր-Պետրոսյանի գլխավորությամբ, ընդդիմությունն անցկացնում էր հանրահավաքներ՝ բողոքելով փետրվարի 19-ի նախագահական ընտրությունների արդյունքների դեմ, որոնցում հաղթանակ էր տարել վարչապետ Սերժ Սարգսյանը։ Մարտի 1-2-ի բողոքի ցույցերը վերածվել են անկարգությունների և ցուցարարների ու իրավապահ մարմինների միջև բախումների, որոնց հետևանքով զոհվել է տասը քաղաքացի և վիրավորվել 265-ը։

Ինչպես հայտնեցին մամուլի ծառայությունից, մեղադրանքը հարուցված է Հատուկ քննչական ծառայությունում հետաքննվող քրեական գործի շրջանակներում:   

Մասնավորապես խոսքը ստիպողաբար բերման ենթարկելիս երեք քաղաքացու նկատմամբ բռնություն կիրառելու մասին է:

Հաղորդագրության մեջ նշվում է, որ նախաքննությամբ ձեռնարկված միջոցառումների արդյունքում պարզվել է Հանրապետության հրապարակում  քաղաքացու նկատմամբ բռնություններ կիրառած, հատուկ միջոց հանդիսացող ռետինե մահակներով հարվածներ հասցրած ոստիկաններից մեկի ինքնությունը:

«Նախաքննության տվյալներով քաղաքացու նկատմամբ  բռնություններ է կիրառել ՀՀ ոստիկանության Երևան քաղաքի վարչության ՊՊԾ գնդի 1-ին գումարտակի 2-րդ վաշտի ջոկի հրամանատար Գեղամ Հարությունյանը,  ում, ձեռք բերված ապացույցների հիման վրա, մեղադրանք է առաջադրվել ՀՀ քրեական օրենսգրքի 309-րդ հոդվածի 2-րդ մասով»,- ասվում է հաղորդագրության մեջ:

Որոնողական աշխատանքներ են կատարվում ոստիկանի կողմից բռնությունների ենթարկված քաղաքացուն հայտնաբերելու ուղղությամբ:-0-