A/H1N1 գրիպի հետ կապված իրավիճակը Հայաստանում հանդարտ է, հիվանդության դեպքեր հանրապետությունում չկան. Առողջապահության նախարարություն

Հայաստանում A/H1N1 վիրուսով վարակվելու դեպքեր չեն գրանցվել, ասվում է ՀՀ Առողջապահության նախարարության պաշտոնական կայքում տեղակայված հաղորդագրության մեջ:

Հաղորդագրության համաձայն, հանրապետությունում շարունակվում է վարակի ներբերման և տարածման կանխարգելմանն ուղված հակահամաճարակային միջոցառումների իրականացումը: Շարունակվում է ուղևորների առողջության նկատմամբ մոնիտորինգի իրականացումը: 

Առողջապահության նախարարությունը հիշեցնում է, որ գրիպանման երևույթների ժամանակ անհապաղ պետք է դիմել բժշկական օգնության, ինչպես նաև չպետք է զբաղվել ինքնաբուժմամբ, պետք չէ օգտագործել առանց բժշկի նշանակման հակավիուսային պատրաստուկներ /Տամիֆլյու/:

Մարդկանց մոտ H1N1 վիրուսով հարուցված գրիպի հիմնական ախտանշաններն են` բարձր ջերմություն, գլխացավ, մկանային ցավ, հազ, անգինա, ռինիտ, որոշների մոտ նկատվել է նաև փսխում և դիարեա: Հիվանդության գաղտնի շրջանը 7 օր է: Հարուցիչը շրջակա միջավայրի առարկաների վրա պահպանվում է մոտ 2 ժամ:

2009թ. օգոստոսի 17 դրությամբ Առողջապահության համաշխարհային կազմակերպության (www.who.int) կողմից աշխարհում գրիպի Ա H1N1 վիրուսով հարուցված դեպքերի վերաբերյալ տեղեկատվության համաձայն, մարդկանց շրջանում H1N1 վիրուսով հարուցված գրիպի 177.457 դեպք կա, այդ թվում` 1.462  մահվան դեպք:

Առողջապահության համաշխարհային կազմակերպութունը չի առաջարկում սահմանափակել ճանապարհորդությունները կամ փակել սահմանները: Մարդկանց խորհուրդ է տրվում հաճախակի լվանալ ձեռքերը` օճառով, և գրիպանման հիվանդության ախտանիշների դրսևորման դեպքում դիմել բժշկական օգնության:-0