Իրանի Քազվին քաղաքի մոտակայում Տու-154 ինքնաթիռի ավիավթարի պատճառների ուսումնասիրման նպատակով ստեղծված Միջպետական ավիացիոն կոմիտեի խումբն արդեն Իրանում է, «Նովոստի-Արմենիա» գործակալությանը տեղեկացրեց ՄԱԿ-ի պետի տեղակալ Օլեգ Երմոլովը:
Թեհրան-Երևան կանոնավոր չվերթն իրականացնող Caspian Airlines ավիաընկերությանը պատկանող Տու-154 ինքնաթիռը չորեքշաբթի ավիավթարի է ենթարկվել Թեհրանի մոտ: Ինքնաթիռում գտնվող բոլոր 168 մարդիկ զոհվել են, որոնցից 15-ն անձնակազմի անդամներն էին: ՀՀ ԱԳՆ-ի տվյալների համաձայն՝ ինքնաթիռում գտնվել է շուրջ 40 հայ, որոնցից հինգը՝ Հայաստանի Հանրապետության քաղաքացի: Փրկարարները գտել են Տու-154-ի բոլոր երեք «սև արկղը», սակայն դրանք խիստ վնասված են:
Երմոլովի խոսքերով՝ Հայաստանի ներկայացուցիչները, միջազգային կանոնների համաձայն, կարող են առանձին խումբ ուղարկել, որը ևս կմասնակցի աշխատանքներին՝ փոխգործակցելով Իրանի ավիացիոն իշխանությունների հետ: Նա նաև նշեց, որ ծրագրվում է ստեղծել խորհրդատուների ընդհանուր խումբ:
Խոսելով ինքնաթիռի «սև արկղերի» վերծանման գործընթացի մասին՝ ՄԱԿ-ի պետի տեղակալը նշեց, որ ՄԱԿ-ը վնասված «սև արկղերի» վերծանման փորձ ունի:
Պատասխանելով կործանված ՏՈՒ 154-ի ինքնագրիչների վերծանման հուսալիության մասին հարցին՝ Երմոլովն ասաց, որ «ամեն ինչ կախված է վնասվածության աստիճանից»:-0-
