«Ուկրաինայի հայերը. երեկ, այսօր, վաղը» միջազգային գիտաժողովը կանցկացվի Ղրիմում

ԵՐԵՎԱՆ, 15 հուլիսի. /Նովոստի-Արմենիա/. Ուկրաինայի հայերի միությանն (ՈւՀՄ) առընթեր Հայագիտության կենտրոնը և Ղրիմի հայկական միությունը (ՂՀՄ) Հայ Առաքելական եկեղեցու Ուկրաինայի թեմի աջակցությամբ կազմակերպում են «Ուկրաինայի հայերը. երեկ, այսօր, վաղը» խորագրով երկրորդ միջազգային գիտագործնական խորհրդաժողովը, որը կանցկացվի 2009թ.-ի սեպտեմբերի 5-6-ը Հայ Առաքելական եկեղեցու «Սուրբ Խաչ» (Ղրիմ) վանքում:

Ինչպես հաղորդվում է ՈւՀՄ-ի կայքում, խորհրդաժողովի շրջանակներում ծրագրվում է իրականացնել աշխատանքներ հետևյալ ուղղություններով՝ հայ-ուկրաինական կապերը՝ անտիկ շրջանից մինչև մեր ժամանակները, Ղրիմի և Ուկրաինայի այլ շրջանների հայկական միջնադարյան բնակավայրերի պատմությունը, Ղրիմում և Ուկրաինայի այլ շրջաններում Հայկական եկեղեցու պատմությունը, Ուկրաինայի հայերի մշակույթը՝ միջնադարից մինչև մեր օրերը, Հայաստան-Ուկրաինա. մշակույթների երկխոսություն, Ուկրաինայում հայկական ուսումնական հաստատությունները՝ ծխական դպրոցները, ուսումնարանները, յոթնամյա դպրոցները, հայ-ուկրաինական դիվանագիտական հարաբերությունները:

Խորհրդաժողովի մասնակիցները կաշխատեն նաև հետևյալ բաժիններում՝ «Հին աշխարհի և միջին դարերի պատմություն», «Նոր և նորագույն պատմություն»: Խորհրդաժողովի աշխատանքների արդյունքում կկազմվի գիտական հոդվածների հավաքածու:-0-