Աշխարհի ամենաերկար ճոպանուղին կկառուցվի Հայաստանի հարավում

Դեպի Տաթև վանական համալիր տանող աշխարհի ամենաերկար ճոպանուղու կառուցման մասին պայմանագիր է ստորագրվել երեքշաբթի Երևանում։

Ճոպանուղու կառուցումը «Տաթևի վերածնունդն ու վերականգնումը» եռամյա ծրագրի բաղկացուցիչ մասն է, որն իրականացնում է Հայաստանի մրցունակության ազգային հիմնադրամը 2009 թվականի փետրվարից։

Տաթևի վանքը խոշոր մշակութային կենտրոն է եղել՝ ձեռագրատնով, արհեստանոցով, գրադարանով և ամենահայտնի համալսարաններից մեկով։

Ինչպես լրագրողներին հայտնեց հիմնադրամի գործադիր տնօրեն Բեկոր Փափազյանը, ծրագրի հիմնական նպատակը հոգևոր և պատմամշակութային բարձր արժեք ունեցող Տաթևի համալսարանի վերականգնումն ու համապատասխան ենթակառուցվածքի ստեղծումն է։

Փափազյանի խոսքերով՝ ծրագրի իրականացումը և ճոպանուղու կառուցումը թույլ կտա մեծացնել Տաթև այցելող զբոսաշրջիկների հոսքը և թեթևացնել դեպի համալիր վերելքը։

«Ճոպանուղու շինարարությունից հետո վերելքը դեպի համալիր կզբաղեցնի մոտ 10 րոպե, իսկ սրահում կտեղավորվի շուրջ 25 մարդ։ Ծրագիրը առանձնապես կարևոր նշանակություն ունի, քանի որ Տաթևը հասանելի է դարձնում նույնիսկ ձմեռվա պայմաններում։ Դա թույլ կտա եռապատկել Տաթև այցելող զբոսաշրջիկների թիվը»,- ասաց նա։

Միաժամանակ Փափազյանը նշեց, որ կապահովվի ճապանուղով վերելքի անվտանգությունը։ Նա տեղեկացրեց, որ շինարարության ծրագրի արժեքը կկազմի 6,8 մլն եվրո։

Ծրագրի իրականացման նախաձեռնությունը ողջունել է Հայաստանի էկոնոմիկայի նախարար Ներսես Երիցյանը, ով հիշեցրեց, որ ՀՀ Սյունիքի մարզում 2009 թվականի հունիսին կայացած արտագնա նիստում հաստատվել է Տաթևի վերկանգնման ծրագիրը։ 

Իր հերթին ճոպանուղու շինարարությամբ զբաղվող «Գարավենտա» շվեյցարական ընկերության վաճառքի գծով տնօրեն Պիտեր Բաումանը նշեց, որ ճոպանուղին լիովին անվտանգ կլինի, քանի որ ընկերության բոլոր օբյեկտները կառուցվում են եվրոպական և համաշխարհային ամենաժամանակակից չափորոշիչներին համապատասխան։ Նա տեղեկացրեց, որ ընկերությունն արդեն 17 հազար օբյեկտ է կառուցել ամբողջ աշխարհում, իսկ «Գարավենտայի» տարեկան շրջանառությունը կազմում է 500-600 մլն դոլար։

ՀՀ կառավարության հունիսի 26-ի որոշումամբ՝ Տաթև վանական համալիրը և հարակից Խոտ, Շինուհայր, Հալիձոր, Տաթև, Սվարանց, Տանձաթափ, Աղվանի և Բարձրավան գյուղերն ընդգրկված են «Տաթև» զբոսաշրջային կենտրոնում։

«Տաթևի վերածնունդն ու վերականգնումը» ծրագիրն իրականացվում է Հայաստանի մրցունակության ազգային հիմնադրամի կողմից և Ռուբեն ու Վերոնիկա Վարդանյանների ստեղծած «Տաթև Ֆաունդեյշըն» հիմնադրամի, ԱՐԳԱ հիմնադրամի ֆինանսական աջակցությամբ, ինչպես նաև «Հայաստան-2020» ծրագրի կողմից։

Ծրագրի գործընկերն է «Ամերիաբանկ» բանկը, որը զբաղվում է ծրագրի սպասարկումմամբ և հանդես է գալիս որպես ֆինանսական խորհրդատու։ -0-