Հայաստանում գազալցակայանի պայթյունից երեք մարդ այրվածքներ է ստացել

Հայաստանում գազալցակայանի պայթյունից երեք մարդ այրվածքներ է ստացել, երկուշաբթի «Նովոստի-Արմենիա» գործակալությանը հայտնեցին ՀՀ ԱԻՆ Փրկարար ծառայությունից:

«Հուլիսի 11-ին, ժամը 17.58-ին ահազանգ է ստացվել, որ հրդեհ է բռնկվել Երևան-Ապարան ավտոմայրուղում` Մուղնի գյուղին հարակից գազալցակայանում:

Դեպքի վայր մեկնած հրշեջ-փրկարարները տեղում պարզել են, որ «Շամյան Արտո» ՍՊԸ-ին պատկանող գազալցակայանի գազամղիչ կայանում տեղի է ունեցել թեթև ուժգնության պայթյուն, որը չի ուղեկցվել հրդեհով»,- ասվում է հաղորդագրության մեջ: 

Պայթյունի հետևանքով 1-ին և 2-րդ աստիճանի այրվածքներ են ստացել գազալցակայանի աշխատակիցներ` 1973 թ. ծնված Ստեփան Հակոբյանը, 1975 թ. ծնված Ատոմ Պողոսյանը և 1983 թ. ծնված Արմեն Մայիլյանը, ովքեր տեղափոխվել են Աշտարակի քաղաքային հիվանդանոց:

Ստանալով առաջին բուժօգնություն՝ տուժածները տեղափոխվել են Երևանի Այրվածքների կենտրոն:

Պայթյունի պատճառներն ու հանգամանքները պարզվում են: -0-