Հայաստանում հայտարարված համաներումը երկրի ներքաղաքական կյանքում կառուցողականության մթնոլորտ մտցրեց. ՀՀ մարդու իրավունքների պաշտպան

ՀՀ մարդու իրավունքների պաշտպան Արմեն Հարությունյանը կարծում է, որ հանրապետությունում հայտարարված համաներումը ծառայեց իր նպատակին՝ կառուցողականության մթնոլորտ ավելացնելով հանրապետության ներքաղաքական կյանքում:

«Համաներումն ավելի շատ իրավական, քան քաղաքական լուծում էր: Համաներում հայտարարելու պահը վաղուց էր հասունացել», - ուրբաթ մամուլի ասուլիսի ժամանակ նշեց նա:

Միաժամանակ Մարդու իրավունքների պատշպանն ավելացրեց, որ համաներումը պետք է տարածվեր նախորդ տարվա մարտյան իրադարձությունների գործով բոլոր ձերբակալվածների վրա, ինչպես խորհուրդ է տրվում Հայաստանի վերաբերյալ ԵԽԽՎ նոր բանաձևում:

«Այդուհանդերձ, չպետք է դիտարկել համաներումը միայն մարտի 1-ի իրադարձությունների համատեքստում: Համաներումը հանրապետության իշխանությունների բարի կամքի դրևսորումն էր, այն լուծեց մի շարք իրավական և ներքաղաքական խնդիրներ», - ընդգծեց Հարությունյանը:

ՀՀ խորհրդարանը հունիսի 19-ին անցկացված արտահերթ նիստում հավանություն էր տվել ՀՀ նախագահ Սերժ Սարգսյանի՝ համաներում հայտարարելու առաջարկությանը: Հայտարարված համաներման համաձայն, պատժից լիովին ազատվում են, մասնավորապես առավելագույնը երեք տարի ժամկետով ազատությունից զրկելու հետ կապված պատիժների դատապարտված անձինք, այն անձինք, որոնց նկատմամբ պատիժը պայմանականորեն չի կիրառվել կամ պատժի կրումը հետաձգվել է, ինչպես նաև ազատությունից զրկելու հետ չկապված պատիժների դատապարտված անձինք:

Համաներումը տարածվում է 2008թ. մարտի 1-2-ը Երևանում քաղաքում տեղի ունեցած իրադարձությունների առնչությամբ հանցագործություն կատարած անձանց վրա, որոնց հինգ տարի ազատազրկում է սպառնում: Համաներումը տարածվում է նաև հետախուզման մեջ գտնվող անձանց վրա, ովքեր կհանձնվեն իրավապահ մարմիններին մինչև 2009թ.-ի հուլիսի 31-ը:-0-