Բաքուն և Երևանը տրամադրված են ղարաբաղյան հակամարտության խաղաղ հանգուցալուծմանը. Բրայզա
Հայաստանի և Ադրբեջանի ղեկավարությունները հակված են ղարաբաղյան հակամարտության խաղաղ հանգուցալուծմանը, ասաց ԵԱՀԿ Մինսկի խմբի ամերիկացի համանախագահ Մեթյու Բրայզան հինգշաբթի Երևանից Բաքու ժամանելուց հետո՝ ՄԽ ԱՄՆ, Ռուսաստանի ու Ֆրանսիայի համանախագաների պատվիրակության կազմում, տեղեկացնում է «ՌԻԱ Նովոստին»՝ հղում անելով Բաքվի Trend տեղեկատվական գործակալությանը։
«Ղարաբաղյան հակամարտության գործընթացում նկատվող առաջխաղացումը վկայում է այն մասին, որ Հայաստանի և Ադրբեջանի նախագահներն ու նախարարները (արտաքին գործերի) շատ լուրջ են մոտենում իրենց գործին, և ամեն կողմը տրամադրված է այդ հակամարտության խաղաղ լուծմանը»,- ասել է նա Հեյդար Ալիևի անվան օդանավակայանում։
Բրայզայի խոսքերով՝ համանախագահները պատրաստել են հակամարտության կարգավորման շրջանակային պայմանագիր, «որի որոշ կետեր չեն բավարարում հայկական կողմին, սակայն կան կետեր, որոնց հետ նրանք համաձայն են»։
Նա նշեց նաև, որ տրամադրությունը Հայաստանում ղարաբաղյան հակամարտության առնչությամբ զգալիորեն բարելավվել է։
«Ես կարծում եմ, որ դա կհանգեցնի որոշակի առաջընթացի բանակցություններում»,- ասել է Բրայզան։
Իր հերթին ֆրանսիացի համանախագահ Բեռնար Ֆասիեն հայտարարել է, որ «Երևանում շատ կառուցողական բանակցություններ են տարվել, և մենք մեծ հույս ունենք, որ Բաքվում էլ նման բնույթի բանակցություններ կանցկացվեն, ինչը թույլ կտա հերթական հաջողությանը հասնել»։
Համանախագահները հայտնեցին նաև, որ Ադրբեջանի և Հայաստանի նախագահների հերթական բանակցությունները նախատեսվում են հուլիսի 17-ին Մոսկվայում։
Նրանց խոսքերով՝ ՀՀ նախագահ Սերժ Սարգսյանի համաձայնությունը հանդիպման վերաբերյալ արդեն ստացվել է, և նրանք հուսով են ստանալ նաև Ալիևի համաձայնությունը։ -0-
