Լեռնային Ղարաբաղի ինքնորոշման իրավունքը պատկանում է ժողովրդին. ՀՀ ԱԳՆ ղեկավար

ԵՐԵՎԱՆ, 8 հուլիսի. /Նովոստի-Արմենիա/. Լեռնային Ղարաբաղի ինքնորոշման իրավունքը պատկանում է ժողովրդին, չորեքշաբթի լրագրողներին ասաց  ՀՀ ԱԳՆ ղեկավար Էդվարդ Նալբանդյանը:

Ինչպես «Նովոստի-Արմենիա» գործակալությանը հայտնեցին հայկական արտաքին քաղաքական գերատեսչությունից, այս մասին Նալբանդյանն ասաց՝ Ադրբեջանի ԱԳՆ ղեկավար Էլմար Մամեդյարովի՝ Ղարաբաղին Ադրբեջանի կազմում ինքնավարություն տրամադրելու մասին հայտարարությունը մեկնաբանելով:

«Արցախի կարգավիճակի հարցը  Ադրբեջանի արտգործնախարարի որոշելիքը չէ, այդ հարցի որոշման իրավունքը պատկանում է Լեռնային Ղարաբաղի ժողովրդին »,- ասաց Նալբանդյանը:  

Ղարաբաղյան հակամարտությունը սկիզբ է առել 1988 թ.-ին, երբ հիմնականում հայերով բնակեցված Լեռնային Ղարաբաղը հայտարարեց Ադրբեջանի կազմից  դուրս գալու մասին։

1991 թ. դեկտեմբերի 10-ին, Խորհրդային Միության փլուզումից մի քանի օր առաջ, Լեռնային Ղարաբաղում տեղի ունեցավ հանրաքվե, որի ժամանակ բնակչության ճնշող մեծամասնությունը՝ 99,89 տոկոսը Ադրբեջանից ամբողջովին անկախանալու կողմ քվեարկեց։

Դրանից հետո սկսվեցին լայնամասշտաբ ռազմական գործողություններ, որոնց հետևանքով Ադրբեջանը կորցրեց վերահսկողությունը Լեռնային Ղարաբաղի և նրան հարակից յոթ շրջանների նկատմամբ։

1994 թ.-ի մայիսի 12-ին՝ զինադադարի մասին համաձայնագրի ուժի մեջ մտնելուց հետո հակամարտության գոտում դադարեցին ռազմական գործողությունները։ Պատերազմի  հետևանքով երկու կողմից զոհվեց մոտավորապես 25-30 հազ մարդ և մոտ  մեկ միլիոնը ստիպված եղավ լքել  բնակավայրերը։

Զինադադարի ռեժիմի մասին համաձայնությունը պահպանվում է մինչ այժմ։

1992 թ.-ից մինչ օրս ընթանում են բանակցություններ հակամարտության խաղաղ կարգավորման ուղղությամբ ԵԱՀԿ Մինսկի խմբի շրջանակներում, որի համանախագահներն են ԱՄՆ-ն, Ռուսաստանը և Ֆրանսիան։-0-