ՀՀ ԱԺ խոսնակ Հովիկ Աբրահամյանը երախտագիտություն է հայտնել Ֆրանսիային և ֆրանսիացի ժողովրդին` Հայաստանին և նրա ժողովրդին անվերապահ աջակցություն ցուցաբերելու համար, հաղորդում է ՀՀ ԱԺ հասարակայնության հետ կապերի վարչությունը:
«Հայաստանի Հանրապետության, մեր ժողովրդի անունից մեկ անգամ ևս ցանկանում եմ մեր երախտագիտությունը հայտնել Ֆրանսիային և ֆրանսիացի ժողովրդին այն համերաշխության և անվերապահ աջակցության համար, որ նա ինչպես մեր պատմության ծանր շրջաններում, այնպես էլ այսօր ցուցաբերում է հայ ժողովրդի և Հայաստանի հանդեպ», - ասել է Աբրահամյանը նախօրեին Փարիզում Ֆրանսիայի հայկական համայնքի ներկայացուցիչների հետ հանդիպման ընթացքում:
Նրա խոսքերով՝ հայ-ֆրանսիական հազարամյա բարեկամությունն անքակտելի է: «Այն հիմնված չէ շահի կամ որևէ պատեհապաշտության վրա, այդ բարեկամությունն արդեն վերածվել է արժեքի», - ասել է ՀՀ խորհրդարանի խոսնակը:
Սակայն, նրա խոսքերով, ամեն արժեք խնամք է պահանջում: «Մեզ վրա է դրված այդ անգին գանձը փոխանցել մեր սերունդներին: Ես կարծում եմ ֆրանսահայության ամենամեծ առաքելությունը հենց սա է: Մանավանդ այնպիսի բարենպաստ պայմաններում, ինչպիսին ստեղծել է Հայաստանի անկախացումը», - ասել է ՀՀ խորհրդարանի խոսնակը:-0-
