Քաղաքակիրթ ներքաղաքական երկխոսության բացակայությունը փչացնում է Հայաստանի միջազգային հեղինակությունը. փորձագետ

Քաղաքակիրթ ներքաղաքական երկխոսության բացակայությունը փչացնում է Հայաստանի միջազգային հեղինակությունը, կարծում է ԼՂՀ նախկին արտգործնախարար, «Հայաստան» համահայկական հիմնադրամի նախկին գործադիր տնօրեն Նաիրա Մելքումյանը:

«Ցիվիլիտաս» հիմնադրամի կազմակերպած «Գռեհկությունը քաղաքական երկխոսության փոխարեն» թեմայով քննարկման ընթացքում Մելքումյանն ասաց, որ Զարուհի Փոստանջյանի հետ կապված վերջին իրադարձությունները ևս մեկ անգամ ցույց տվեցին, որ երկրում քաղաքակիրթ քաղաքական երկխոսություն չկա:   

Զարուհի Փոստանջյանը հունիսի 24-ին ԵԽԽՎ-ի քննարկմանն է ներկայացրել մի փաստաթուղթ, որը պարունակում է, մասնավորապես, 2008 թ.-ի մարտյան իրադարձությունների հետ կապված ձերբակալված անձանց ազատ արձակման մասին պահանջը, փաստահավաք խմբի գործունեության վերսկսումը: Միաժամանակ Փոստանջյանը փաստաթուղթը ստորագրելու խնդրանքով դիմել է Թուրքիայի և Ադրբեջանի ներկայացուցիչներին, որոնց հետո Հայաստանը բարդ հարաբերություններ ունի:

«Կառուցողական քննադատության ու երկխոսության բացակայությունն անպայման լուրջ արտաքին քաղաքական հետևանքներ կունենա, քանի որ նման խոսակցությունները անխոս չփացնում են երկրի միջազգային հեղինակությունը»,- ասաց Մելքումյանը:

Իր հերթին ազգագրագետ Հրանուշ Խառատյանը նշեց, որ հայկական հասարակությունում բացակայում է հանդուրժողականությունն ու կառուցողական քննադատության կուլտուրան:

«Ցանկացած անհամաձայնություն օտար կարծիքի հետ վերաճում է առանց վերլուծության ու սեփական կարծիքի հիմանվորման գռեհկաբանության լեզվի»,- ասաց Խառատյանը՝ ընդգծելով, որ որքան էլ տարօրինակ լինի, խնդիրները, որոնք ավելի լուրջ են, քան ԵԽԽՎ-ում պատգամավորի գործողությունները, նման արձագանք չեն ստանում: -0-