Եվրոպացի խորհրդատուները ներկայացրել են իրենց գործունեությունը Հայաստանում և նշել հետագա ծրագրերը

Եվրամիության խորհրդատվական խումբը, որը խորհրդատվական աջակցություն է տրամադրում ՀՀ պետական մարմիններին ու գերատեսչություններին «Եվրոպական հարևանության» քաղաքականության գործողությունների ծրագրի առավելագույն արդյունավետ իրականացման համար, ուրբաթ իր աշխատանքները ներկայացրեց 2009թ.-ի առաջին եռամսյակի համար և նշել հետագա ծրագրերը:   

Եվրոպացի խորհրդատուների մասնակցությամբ ուրբաթ կայացած նիստի ժամանակ ՀՀ Ազգային անվտանգության խորհրդի քարտուղար Արթուր Բաղդասարյանը նշեց, որ խումբն աշխատանքներ է տանում 200 որոշակի ծրագրերով շուրջ 20 գերատեսչությունում:

«Մենք խմբի անդամների ավելի ակտիվ մասնակցությունն ենք ակնկալում բարեփոխումներ գործընթացում, նրանց ավելի լիարժեք ինտեգրումը նշված ծրագրերի իրականացման գործում»,- նշեց Բաղդասարյանը:

Իր հերթին, Հայաստանում Եվրոպական հանձնաժողովի պատվիրակության ղեկավար, դեսպան Ռաուլ դե Լուցենբերգերը նշեց, որ խորհրդատվական խումբը գործիքների լայն հավաքածու է տրամադրում բարեփոխումների արդյունավետ իրականացման համար:  

«Մենք հատկապես կարևորում ենք հայկական խորհրդարանի աշխատակազմում, ինչպես նաև հարկային ու մաքսային ծառայություններում բարեփոխումների իրականացումը»,- ասաց դե Լուցենբերգերը:  

Նա նշեց, որ մնացած ոլորտներում արդեն կան որոշակի արդյունքներ, օրինակ, Էկոնոմիկայի նախարարությունում և ԱԳՆ-ում: 

«Հիմնական հաջողությունները գրանցվել են կոռուպցիայի դեմ պայքարում»,- ընդգծեց դեսպանը:

Խորհրդատվական խմբի ղեկավար Ռոլֆ Բոենկեն ներկայացրեց աշխատանքի առաջին երեք ամիսների հաշվետվությունը՝ նշելով, որ խմբի հիմնական նպատակը աշխատանքի սկզբնական փուլում կոռուպցիայի դեմ պայքարն էր:  

«Մենք մեր դիտողություններն արեցինք մարդու իրավունքների պաշտպանության ազգային ծրագրի առնչությամբ, ինչպես նաև հասարակական ծառայությունների ոլորտում բարեփումների առնչությամբ»,- ասցա Բոենկեն:

Նա նշեց նաև, որ խումբն ակտիվորեն աշխատում է Հայաստանում դիվանագիտական ակադեմիայի ստեղծման, ինչպես նաև ֆինանսական հատվածի բարեփոխումների ուղղությամբ:

Խմբի ղեկավարը հայտնեց, որ հաջորդ հաշվետվությունը կներկայացվի 2009թ.-ի սեպտեմբերին:  

Հայաստան ԵՄ խորհրդատուների ուղարկման մասին պայմանավորվածությունը ձեռք է բերվել նախագահ Սերժ Սարգսյանի՝ Բրյուսել կատարած այցի ժամանակ 2008թ.-ի նոյեմբերին:   

Խմբի նպատակը ՀՀ պետական մարմիններին ու գերատեսչություններին խորհրդատվական աջակցություն ցուցաբերելն է քաղաքական ու տնտեսական բարեփոխումների համատեքստում «Եվրոպական հարևանության» քաղաքականության գործողությունների ծրագրի առավելագույն արդյունավետ իրագործման համար:-0-